DOVE MAGAZINE

Kwihana abunganizi kwa Uwinkindi kwateshejwe agaciro, yihana n’Umucamanza

kwihana abunganizi bashya Pasiteri Jean Uwinkindi yahawe nyuma y’aho abo yahoranye bivanye mu rubanza kwateshejwe agaciro, ahita yihana n’Umucamanza ukuriye inteko imuburanisha, amushinja urwango mu rubanza rwe.

Kuri uyu wa 6 Gashyantare 2015, Urugereko rwihariye rw’Urukiko rukuru ruburanisha ibyaha byo ku rwego mpuzamahanga n’ibyambukiranya imbibe, rwatangaje umwanzuro ku kwihana abavoka bashya Jean Uwinkindi yagenewe n’Urugaga rw’Abavoka, rwanzuye ko abagumana bakamwunganira, kuko nta Tegeko rimuha uburenganzira bwo kwanga ubufasha yagenewe nk’utishoboye.

Mu iburanisha ryabaye kuwa 5 Gashyantare, Urugaga rw’Abavoka rwohereje Me Ngabonziza Joseph na Me Hishamunda Isacar gusimbura Me Gatera Gashabana na Me Jean Baptiste Niyibizi yahoranye bakaza kuva mu rubanza, ariko Uwinkindi arabanga avuga ko atabazi.

Uwinkindi ushinjwa ibyaha bya Jenoside yakorewe abatutsi muri Kayenzi mu Bugesera

Yagaragarije urukiko ko yabahawe mu buryo bunyuranyije n’amategeko, ko yagombaga kwihitiramo abe ku bari ku rutonde rw’Urugaga rw’Abavoka mu Rwanda.

Urukiko rwasanze ibisobanuro byatanzwe n’Ubushinjacyaha ko Uwinkindi nta tegeko na rimwe rimwemerera kwihitiramo Abavoka mu gihe atabashije kubiyishyurira bifite ishingiro, rwanzura ko Me Ngabonziza na Me Hishamunda boherejwe n’Urugaga rw’Abavoka bakomeza kumwunganira.

Akimara kumva icyo cyemezo, Uwinkindi n’uburakari bwinshi yahise avuga ko atabashaka, ndetse asaba ko bamuhaguruka iruhande, yongeraho ko icyo cyemezo akijuririye, kuko kibangamiye uburenganzira bwe ku butabera.

Yahise yihana Umucamanza Alice Rulisa, Perezida w’Inteko Iburanisha, avuga ko adashaka ko yongera kumuburanisha, amushinja icyo yise ”ubwanzi” mu rubanza rwe.

Urukiko rwanzuye ko hazasuzumwa niba ukwihana umucamanza kwe bifite ishingiro hakurikijwe ibiteganywa n’amategeko.

Ubushinjacyaha bwabwiye Urukiko ko niba Uwinkindi yanze Abavoka yahawe, azirengera ingaruka zirimo kuba yakwiburanira kuko ngo atari umwana cyangwa umurwayi, cyangwa kwihitiramo abamwunganira akabiyishyurira, cyangwa se akava mu rubanza ariko rugakomeza.

Ubushinjacyaha bwari bwagaragarije Urukiko ko kuba umuburanyi adafite ubushobozi bwo kwiyishyurira Avoka nta tegeko rimwemerera kwihitiramo abamwunganira, bubisobanura bwifashishije Urubanza rw’ubujurire rwa Akayezu Jean Paul mu Rukiko mpuzamahanga rwashyiriwho u Rwanda i Arusha.

Ibyasuzumwe kandi bikanafatwaho ibyemezo muri uru rubanza, bishingiye ku mihemberwe ya Me Gatera Gashabana na Me Jean Baptiste Niyibizi, bivanye muri uru rubanza bamaze guhembwa amafaranga y’u Rwanda asaga miliyoni 82, bakanga kwemera miliyoni 15 bahabwaga na Minisiteri y’Ubutabera kugira ngo baburane urubanza rurangire.

Uru rubanza ruzasubukurwa ku itariki izatangazwa nyuma.



SRC: IGIHE

Umuco wo gushaka umuranga waribagiranye mu Rwanda!
Museveni yamaganye abavuga ko yibye amajwi, anagira inama abatavuga rumwe na we
No mu bayobozi harimo ababangamira umutekano w’igihugu – Polisi
Hillary Clinton arashinja umuyobozi wa FBI kugira uruhare mu gutsindwa kwe

Tanga igitekerezo

Kwamamaza

Developed by Amitabha Technology, Inc.