DOVE MAGAZINE

Umuraperi Gaël Faye yavuze icyatumye yimukira mu Rwanda

Umuraperi w’Umunyarwanda ufite ubwenegihugu bw’u Bufaransa, Gaël Faye amaze igihe kigera ku mwaka yimukiye mu Rwanda igihugu afitemo umugore n’abana babiri b’abakobwa.

Uyu mugabo w’imyaka 35 y’amavuko, yari amaze imyaka irenga 20 atuye mu Bufaransa igihugu yagezemo afite imyaka 13 ari nabwo yatangiye iby’umuziki no kwiyumvamo impano yo kwandika.

Yavuze ko kuza gutura mu Rwanda kuri we ari ishema n’ibyishimo ndetse ko abifata nk’amahirwe dore ko atagize amahirwe yo kuhaba igihe kuva mu buto bwe. Yarahavukiye ariko akurira i Burundi amaze kuba ingimbi bajya gutura i Paris.

Gaël Faye ufite igitabo kiri guca ibintu i Burayi cyitwa ‘Petit Pays’ yabwiye TNT ko yifuza kuba mu Rwanda akamenya mu buryo bwimbitse ibijyanye n’inkomoko ye nyuma y’uko yamaze imyaka myinshi aba mu Bufaransa.

Yagize ati “Yego maze igihe kirenga umwaka mba mu Rwanda […] Ndashaka kumenya urundi ruhande rw’inkomoko yanjye kuko ndi Umufaransa nkaba n’Umunyarwanda ariko wakuriye i Burundi. Ntabwo nigeze menya neza iki gihugu nahazaga gusa mu biruhuko.”

Yongeyeho ko mu migambi afite mu myaka izaza yifuza gukora ibiteza imbere iki gihugu, kwita ku muryango we n’abana be bari mu Rwanda. Ati “Icyo nshaka ni uguteza imbere iki gihugu no guha urukundo umuryango wanjye n’abana. Ndashaka ko babona uburere bwiza no guteza imbere umuryango tubamo.”

Gaël Faye yavuze ko mu Rwanda azakomeza gahunda yo gukora umuziki, kwandika inkuru nshya no gukomeza kwandika ibindi bitabo mu guteza imbere impano ye.

Igitabo yanditse kimaze guhabwa ibihembo bikomeye i Burayi, giherutse guhabwa icyitwa France Culture-Télérama, iki gitangwa na radio ikomeye mu Bufaransa yitwa France Culture ifatanyije n’ikinyamakuru cyandika ku mpapuro cya Télérama.

Mu mezi atatu ashize igitabo cya Gaël Faye cyahawe ibindi bihembo birimo ‘Prix Goncourt des lycéens’ gitangwa na Fnac[ Fédération nationale d’achats] ifatanyije na Minisiteri y’Uburezi muri iki gihugu.

Gaël Faye yari amaze igihe gito kimwe ahawe ikindi gihembo gikomeye cya Prix du Premier Roman (First Novel Prize) gisanzwe gitangwa ku banditsi batarubaka izina bari mu kigero cy’imyaka hagati ya 18 na 30.

 

Muri Nzeri 2016, iyi Fnac yahembye Gaël Faye nk’umwanditsi mwiza w’umwaka mu cyiciro cy’abanditse ibitabo byo mu bwoko bwa Roman. Icyo gihe ‘Petit Pays’ cyatoranyijwe mu bitabo 650 byitabiriye irushanwa uyu mwaka.

 

Gael Faye asigaye atuye mu Rwanda

 

Gaël Faye n’umugore we Violaine baherutse gusezeranira mu Rwanda

 


SRC: IGIHE

Umukunzi wa Nicki Minaj yahakanye ibyo kurushinga kwabo
Bull dog yatangaje ngo icyamubujije gutwara Guma Guma ya 5
Taylor Swift na Calvin Harris batandukanye, Zayn na Gigi rusaza nk'isabune
Cristiano ayoboye urutonde rw’abakinnyi binjije akayabo mu 2015

Tanga igitekerezo

Kwamamaza

Developed by Amitabha Technology, Inc.