DOVE MAGAZINE

Uko umunsi wa mbere w’Ibikorwa byo kwiyamamaza bya Perezida Kagame wagenze (Amafoto)

Share Button

Kuri uyu wa Gatanu tariki ya 14 Nyakanga 2017, mu Karere ka Ruhango mu kibuga cya Kibingo no ku cya Rwabicuma i Nyanza niho ibihumbi by’abanyamuryango ba FPR Inkotanyi bateraniye mu gikorwa cyo kwamamaza umukandida wayo, Paul Kagame.

Kuva mu mihanda ya Kigali werekeza mu Karere ka Ruhango, abantu bari benshi ku mihanda bitegura kwakira Perezida Kagame aho ari bunyure hose yerekeza mu Ruhango na Nyanza.

Kuri gahunda y’uyu munsi ibikorwa byo kwiyamamaza k’umukandida wa FPR Inkotanyi byatangiriye mu Karere ka Ruhango ku isaha ya saa tanu, nyuma bikomereza i Nyanza saa saba.

Uko iki gikorwa cyagenze umunota ku wundi:

15:30: Perezida Kagame asoje umunsi wa mbere w’ibikorwa bye byo kwiyamamariza Umwanya w’Umukuru w’Igihugu.

-  Abashyigikira Green Party, bashobora kuzajya muri RPF

Perezida Kagame ati “Muri RPF turusha Green Party kuba green. Abashyigikira Green Party kubera politiki yo kuba green buriya bazageraho bajye muri RPF. Ariko ndabivuga gusa mu kubabwira ko tubashimiye kuko mu buryo bwa politiki buri wese agira uburenganzira.”

-  Ikinyuranyo kiragaragara

“Musubize amaso inyuma gato murebe imyaka 23 ishize, abenshi hano ndabona bari bataravuka ariko abari bakuru icyo gihe barabizi. Uhereye aho ukageza uyu munsi, ikinyuranyo kiragaragara.”

Ati “Niba twaravuye aho tukaba tugeze aho turi ubu, niba iyo nzira twanyuze yitwa ko tutakurikije icyifuzo cy’abaturage cyangwa amahame ya demokarasi icyo cyaha ndacyemeye. Dukomeze turusheho kwiyubaka tugana imbere, ku buryo buri Munyarwanda wese, inyungu y’ibikorwa byacu, y’amajyambere yacu igombe ibagereho. Ntabwo tubikorera ishimwe ry’abandi turikorera. Abatanga amanota, bandika, bavuga akenshi bitanabareba, nibakomeze bate umwanya wabo. Dukomeze twubake urubyiruko rwige rubone imirimo rukora rugire n’umuco rushingiraho.”

Yasabye Abanyarwanda kugira icyizere no gukora ibintu bizima.

Perezida Kagame yatangaje ko usubije amaso inyuma mu myaka 23 ishize ibyagezweho bigaragara

-  Iyo dutsinze ingamba ntabwo twigamba

Perezida Kagame ati “Tumaze gutsinda ingamba nyinshi ariko iyo dutsinze ingamba ntabwo twigamba. Oya. Ndetse no mu gutsinda kwacu twubahiriza uburenganzira bwa buri wese niyo yaba akora, niyo yaba uyumva ibidasa n’ibyacu. Amasomo benshi baba bashaka gutanga ntayo dukeneye, twarabirenze tugeze kure cyane, umwanya wacu munini tugomba kuwushyira ku kwiyubaka no kubaka igihugu cyacu.”

14:55:Perezida Kagame ati “Turashaka kwihuta kandi tukagera kure. Ubwo ni ukuvuga ngo rero dufatanya ibintu bibiri. Bisaba umuntu umwe mu bikorwa bye gukora akihuta ariko kugira ngo tugere kure buri umwe ukora kandi yihuta turashaka ko ajyana n’undi. Turashaka kujyana twe. Turashaka kwihuta, turashaka kugera kure. Iyo nzira tuyirimo rero.”

Uyu munsi hatangiye igikorwa cyo kwipima ngo turebe niba twihuta ngo tugendere hamwe. Byahereye kera igihe cya referandum, n’aho yaturutse murahibuka, simwe mwabisabye se? Ubundi rero tujya tubahamagara mukatwitaba ariko ubu nimwe mwaduhamagaye turabitaba. Mwaduhamagaye muri ya masinya abantu basinye bashaka ko habaho referandum, murongera mudutumira muri referandum nibyayivuyemo turabitaba. Igisiyaye ni ukugendera hamwe kandi tukagera kure.

Naho abajya gutega ngo babaze ngo muri aya matora ninde uzatsinda, ibyo mwabirangije kera, abajya gutega bakanyuranya n’ibyo bakwiriye kuba babona abo amafaranga yabo aragiye.

Abavuga ko uyu mwihariko ubu budasa bw’u Rwanda atari demokarasi, igihe cyabo cyangwa ibyo biga kuri demokarasi bagipfushije ubusa. Ubundi muri demokarasi ikiza mbere ni icyifuzo cy’abantu gishingira uko biyumvamo, icyo bungukamo..icyemezo gifatwa kikaba icya benshi kikubahiriza uburenganzira bwa buri wese n’abatagiye muri iyo nzira.”

Perezida Kagame yashimangiye ko mu gutsinda kwa FPR batigamba kandi bubahiriza uburenganzira bwa buri wese

Abarwanashyaka ba PL bifatanyije n’abanyamuryango ba FPR Inkotanyi mu bikorwa byo kwamamaza Paul Kagame

Perezida Kagame yashimangiye ko mu gutsinda kwa FPR batigamba kandi bubahiriza uburenganzira bwa buri wese

Ibihumbi by’abanye-Nyanza bashyigikiye Perezida Kagame mu bikorwa byo kwiyamamaza

Nyanza intero ni imwe “Tora Kagame twubake u Rwanda twifuza”

Perezida Kagame yatangaje ko iby’uzatsinda amatora, Abanyarwanda babirangije kera

N’abakecuru bari bizihiwe bikomeye

14:52: Ukuriye ibikorwa byo kwiyamamaza ku rwego rw’Igihugu, Minisitiri w’Umuco na Siporo, Uwacu Julienne, niwe uhawe umwanya nkuko byari byakozwe mu Ruhango.

Minisitiri Uwacu yavuze ko i Nyanza hari umucyo, umuco n’ubuzima kandi ibyagezweho birimo umukamo birigaragaza kuko uwageze mu Majyepfo ntatahane ikivuguto cy’i Nyanza ababara cyane. Hari kandi uruganda rutunganya amata bahawe.

Uyu murenge ukorerwamo ubuhinzi buteye imbere yaba ku materasi no kuhira, bahabwa nkunganire, begerejwe abagoronome n’aba veterineri. Hari kandi umuhanda wakozwe uhuza aka Karere n’aka Nyamagabe, hubatswe amashuri abana bariga.

Minisitiri Uwacu ahise aha ikaze Umukandida wa FPR Inkotanyi kugira ngo ageze imigabo n’imigambi yateguriye abaturage b’i Nyanza.

Minisitiri wa Siporo n’Umuco, Uwacu Julienne, yatangaje ko i Nyanza bageze kuri byinshi birimo no kuba igicumbi cy’amata mu rwa Gasabo

Ku kibuga cya Rwabicuma muri Nyanza hari hateraniye ibihumbi by’abanyamuryango ba FPR Inkotanyi bamamaza umukandida wayo, Paul Kagame

Bari bagerezanyije amatsiko kureba umukandida wa FPR Inkotanyi, Paul Kagame

Abiganjemo urubyiruko banambaye imyenda ya FPR Inkotanyi basazwe n’ibyishimo byo kumva imigabo n’imigambi y’umukandida wabo

Abakecuru bicumbye akabando bajya gushyigikira Paul Kagame

Uwacu ati “ I Nyanza hari ubuzima […] inka mwagabiye abanye-Nyanza zimaze kororoka. Umukamo ntabwo ugarukira mu rugo rw’abatunzi, umuntu wese uje mu Majyepfo iyo atashye ntatahane ikivuguto cy’i Nyanza ngira ngo agenda ababaye.”

14:50: Hari kuririmbwa indirimbo isusurutsa abantu bitabiriye iki gikorwa cyo kwamamaza umukandida wa FPR Inkotanyi iha ikaze Perezida Kagame.

14:40 : Mukashema Marie Grace niwe uhawe umwanya ngo atange ubuhamya bw’ibyo yagezeho mu gihe cyose Paul Kagame amaze ayobora u Rwanda.

Avuze ko abagore b’i Nyanza bashyigikiye Paul Kagame ndetse bamaze no kumutora. Uyu mugore avuze ko yasubiye mu ishuri afite imyaka 36 y’amavuko, abasha kwiga nyuma binamuhesha amahirwe yo kwihangira imirimo.

14:25: Perezida Kagame amaze kugera i Nyanza ku kibuga cya Rwabicuma, ahakomereje ibikorwa bya FPR Inkotanyi byo kwamamaza umukandida wayo. Yakirijwe amashyi n’impundu haririmbwa indirimbo y’Umuryango wa FPR Inkotanyi. Ahita abanyuramo abasuhuza.

14:20: Abanyamuryango ba FPR Inkotanyi ibihumbi nibo bambariye kwakira Perezida Kagame. Ntibakanzwe n’izuba ryinshi ryaramutse muri aka gace.

Kitoko Bibarwa wavuye mu Bwongereza yifatanyije n’abaturage b’i Nyanza mu bikorwa byo kwamamaza Umukandida wa FPR, Paul Kagame

Bavuga mu ijwi rirenga bati ” Uwagaruye ubumwe mu Banyarwanda nta wundi ni Kagame”

13:30: Abahanzi barimo Kitoko, Christopher bakomeje gususurutsa imbaga itegerezanyije ubwuzu umukandida wa FPR-Inkotanyi, Kagame Paul, ugiye gukomereza ibikorwa byo kwiyamamaza mu karere ka Nyanza ku kibuga kiri mu Murenge wa Rwabicuma. Avuye mu gikorwa nk’iki mu Karere ka Ruhango.

Ibyuma bya kizungu byifashishijwe mu kugaragaza ko bashyigikiye ko Perezida Kagame akomeza kubayobora

Abanyamuryango ba FPR Inkotanyi bitegura kwakira Perezida Kagame i Nyanza

Abagore b’i Nyanza bashyigikiye Paul Kagame ndetse bamaze no kumutora

Ab’i Nyanza bahaye ikaze Umukandida wa FPR Inkotanyi mu muteguro wa Kinyarwanda

Ba mutima w’urugo bakoze umuteguro udasanzwe w’uruhimbi, barukikiza ikimenyetso cyo kwerekana ko bashimira umukuru w’igihugu wabahaye inka

Umuhanzi Masamba Intore mu baherekeje Perezida Kagame mu bikorwa byo kwiyamamaza

Abahanzi batandukanye basusurutsa abitabiriye ibikorwa byo kwiyamamaza mu Karere ka Nyanza

I Nyanza n’aho bari mu bicu biteguye kumva imigabo n’imigambi y’Umukandida wa FPR Inkotanyi

Urubyiruko, abasaza n’abakecuru bitabiriye ku bwinshi ibikorwa byo kwiyamamaza

Bari bafite ibyuma bisohora umuziki n’umudiho uhambaye

Mu Karere ka Nyanza imyiteguro y’umukandida wa FPR, Kagame Paul yakozwe mu isura idasanzwe kuko uretse umuteguro w’ibitambaro by’amabara y’ibendera ry’uyu muryango, bateye amarangi n’ibiti, imikingo yo ku muhanda n’ibindi byuje ubutumwa bwo gutora uyu mukandida kugirango bakomeze kwiteza imbere.

Mu Murenge wa Rwabicuma muri aka karere, abaturage ibihumbi n’ibihumbi biganjemo urubyiruko n’abagore baje gushyigikira Kagame Paul, bitwaje amabendera, imyambaro n’ibindi birango bya FPR-Inkotanyi.

Ikoranabuhanga ni kimwe mu byitaweho cyane muri ibi bikorwa byo kwiyamamaza bya FPR kuko hari bose babireba [screen] nini, indangururamajwi zihambaye bifasha buri muturage gukurikira umunota ku wundi ibibera hano. Nyanza nka kamwe mu turere tugira umusaruro mwinshi w’amata, ba mutima w’urugo bakoze umuteguro udasanzwe w’uruhimbi, bakaba barukikije nk’ikimenyetso cyo kwerekana ko bashimira umukuru w’igihugu wabahaye inka.

Bamwe mu baturage baragaragaza ibyishimo bidasanzwe batewe no kwakira Kagame Paul, wiyamamaza mu matora y’Umukuru w’Igihugu ateganyijwe mu kwezi gutaha.

Mukantwari Sarah w’imyaka 46 wo mu murenge wa Busasamana mu kagari ka Nyanza, yagize ati“Ndishimye cyane kuba agiye kuza hano, bitewe n’ibyiza yankoreye numva nta wundi natora utari Paul Kagame. Nagize ikibazo cy’uburwayi barangoboka bampa imiti, ntacyo namunganya yandutiye data na mama. Yaduhaye inka, amashuri, amavuriro, ubu dufite n’amazi meza.”

Yakomeje agira ati “Aramutse atowe ikintu yadufasha nuko yaduha amashanyarazi, dutuye ahantu hitwa Gishike, ni mu nkengero z’umujyi ariko ntabwo ducana.”

Mukarugira Rita w’imyaka 78 wo mu murenge wa Nyagisozi mu karere ka Nyanza, we yagize ati “Yatugejeje kuri byinshi abakecuru yaduhaye ingoboka twari twishwe n’inzara aradufungurira, ubu mfite inka…nta wundi naha ijwi ryanjye.”

Tuyishimire Jean Marie Vianney w’imyaka 20, yaturutse mu murenge wa Cyabakamyi, ugiye gutora bwa mbere Perezida wa Repubulika ati “Nkatwe urubyiruko Perezida Kagame yadukoreye byinshi, ubu turiga yaba amashuri asanzwe n’ibindi. Twashyiriweho ibigega bidufasha kwiteza imbere. Nta cyambuza kumutora ngo akomeze kudukorera ibyiza.

Kuri iyi site ya Nyanza urubyiruko rufite ubumuga bwo kutumva no kutavuga rwashyiriweho ahantu hihariye ndetse rugenerwa n’abasemuzi barufasha gukurikirana igikorwa ku kindi nk’abandi.

Abarwanashyaka ba PSD barangajwe imbere na Senateri Ntawukuriryayo Jean Damascène n’aba PL mu myambaro y’amashyaka yabo iriho ifoto ya Kagame Paul baje kumushyigikira.

Nyanza ni akarere kagizwe n’imirenge 10, gatuwe n’abaturage 323,719 ku buso bwa kilometero kare 617.2. Muri aka karere muri manda ishize ya Perezida Kagame kageze kuri byinshi birimo:

- Iyubakwa ry’umuhanda wa kaburimbo ureshya na kilometero 12.7 mu gihe mu 2010 hari hubatswe kilometero 1.1.

- Binyuze muri gahunda ya VUP, abaturage bubatse imihanda yo koroshya ubuhahirane ireshya na kilometero 103, ugereranyije na kilometero 52 byubatswe mu myaka irindwi ishize (2010).

- Mu bijyanye n’imiturire, gutura neza byavuye kuri 25% bigera kuri 51%. Abagerwagaho n’amazi meza bavuye kuri 52% mu 2010 bagera kuri 76% uyu munsi.

Ku byapa byinshi hariho amafoto yamamaza Perezida Kagame

Mu Karere ka Nyanza, uwahinjiraga yasanganizwaga n’amabara agaragaza ibendera rya FPR Inkotanyi

Ku mihanda werekeza mu Karere ka Nyanza hatatswe kugeza no ku nzu z’abaturage baturiye kaburimbo

Imodoka zatatsweho ubutumwa bwamamaza Perezida Kagame

Imihanda yatatsweho amabara y’ibendera rya FPR Inkotanyi ahantu hose

Kuri Sitasiyo zicuruza lisansi naho hatatswe mu buryo budasanzwe

Igikorwa cyo kwiyamamaza cyaberaga mu Karere ka Ruhango gikomereje i Nyanza. Hano kirasojwe

Mu Karere ka Ruhango, imyaka irindwi ishize Perezida Kagame ari Umukuru w’Igihugu, ni byinshi kabashije kugeraho. Muri ibyo twavuga:

- Ingo zabonye amashanyarazi zavuye kuri 2.7% mu 2010 zigera kuri 27%. Ibi byiyongera ku kuba hari amatara acanira abaturage ku muhanda ku ntera y’ibilometero 21.

- Mu buhinzi: Hegitari 29 470 z’ubutaka zaratunganyijwe zivuye kuri 24 420 mu 2010.

- Ubutaka bwuhirwa muri aka karere bungana na hegitari 122

- Ubuhunikiro bwavuye kuri 19 mu 2010 bugera kuri 38.

- Inka zatanzwe muri Girinka zavuye ku 1943 mu 2010 zigera ku 10 178.

Abanyarwanda bakwiriye ubukire – Perezida Kagame

Perezida Kagame yavuze ko amashuri atanga uburezi bufite ireme, amavuriro atuma ubuzima bw’Abanyarwanda buzira umuze n’ibikorwaremezo aribyo Abanyarwanda bakwiriye, bityo ‘Abanyarwanda bagakira, bakagira umutekano, bagakomeza ubumwe, bakagira uburenganzira nyarwanda, uburenganzira bwo kuba icyo ashaka kuba atabangamiye undi mugenzi we’.

Perezida Kagame yatangaje ko yishimira ko ibizava mu matora bizwi kandi Abanyarwanda aribo bihitiyemo ikibabereye

“Ibiva mu matora birazwi”

Perezida Kagame ati “Ibiva mu matora birazwi kandi birazwi nyine. Nonese? Uwo bimena umutwe bimumene umutwe. Twe rero ibi by’amatora byo kwiyamamaza, tubigire ibyo kwishima. Dukwiriye kwishimira icyo turi cyo kubera ko niko tubishaka, niko tubyifuza. Ibikorwa bijyanye no guteza imbere icyo turicyo nabyo birashimishije naho u Rwanda kuba rukora ibyo abantu batumva neza ni amateka, ni ubudasa, niko twasanze tugomba gukora bitewe n’amateka yacu tugerageza gukosora, gushyira mu buryo kandi amateka yacu ntabwo asa cyane n’ay’abandi. Nubwo hari aho ahurira.”

11:55: Perezida Kagame afashe ijambo aho atangiye ashimira abaturage bitabiriye iki gikorwa, ashimira mu buryo bw’umwihariko abayobozi b’amashyaka yashyigikiye FPR Inkotanyi.

“Uhereye kuri PSD, PL, PDC, PDI, UDPR, PSL, PPC, PSP ariko ndashimira n’andi atari hano ku zindi mpamvu. Ari Green Party ari n’irindi naryo Imberakuri.”

Yakomeje agira ati “Ariya yandi umunani yashyize mu gaciro gakomeye yifatanya na RPF mu nzira irimo kugira ngo dufatanyije dukomeze kubaka u Rwanda rwacu. Turwubake mu nzira twahisemo.”

Mu ijambo rye, Perezida Kagame yagize ati “Reka nshimire cyane FPR n’abayoboke bayo kubera byinshi byavuzwe, byakozwe. Sauteur yabivuze sinirirwa mbisubiramo, Uwacu yabivuze… FPR cyane cyane yazanye ubumwe mu Banyarwanda, Abanyarwanda bajya hamwe tukaba umwe … bitabujije ko abantu bashobora kugira ibitekerezo bitandukanye ariko tugahurira ku kintu kimwe. Kuba Abanyarwanda no kubaka u Rwanda.

Ndashimira FPR icyizere yigirira kandi yakomeje kungirira njyewe ubwanjye, niyo mpamvu mpagaze hano kugira ngo nongere ku bitari ibanga ko ndi umukandida wa FPR.

Iyo migabo n’imigambi ya FPR niyo turi hano kwizihiza, kwishimira no kwitangira mu bikorwa biri imbere yacu. […] niba mukurikira amakuru neza yo hirya no hino, abanyamakuru bagira uburenganzira ariko baranabukwiriye ariko ndagira ngo mvuge ko atari bo bonyine babukwiriye […] barandika bakavuga ngo aya matora y’u Rwanda nta matora arimo kuko tuzi ikizayavamo ariko rwose njye biranshimishije kuba tuzi ikizayavamo.

Ikizayavamo uwagihakana wese akavuga ngo ntakizi, bakavuga ngo uko kwirengagiza niyo politiki nziza niyo demokarasi, barabeshya. Reka nkubwire impamvu. Ikizayavamo cyamenyekanye mu kwezi kwa 12 mu 2015. Buriya hajya kuba impamvu ya referendum, ikintu cyasabwe na miliyoni enye z’abantu bazatora kikagera aho kigera muri referendum bikagera aho bifata hafi 100% ubwo ikizavamo ni iki?

Rero byaba ari ukubeshya, iyo politiki yo kubeshya ntabwo iba mu Rwanda iba aho handi. Byongereye kuri iyo referendum, amashyaka maze kubasomera hano yashishoje agahitamo gufatanya na FPR bikiyongera kuri wa mukono, kuri ya masinya yasabye referendum arenga miliyoni enye, ubwo urumva igisigaye ari iki? No kuza hano, kuza kuganira namwe, kubonana namwe, ni ukubizeza ko tuzafatanya imihigo yo kubaka iki gihugu nkuko bisanzwe tukagera no kuri byinshi birenze ibyo twagezeho.

Ni ukuza kubabaza ngo ya nzira yatugejeje kuri referendum n’ibyavuyemo, n’ibyiyongereyeho n’amashyaka twafatanyije niko bikimeze? Niba ariko bikimeze, urumva amatora yo yararangiye.

Ababaza (ba banyamakuru navugaga) ngo ese umukandida wa FPR, barabaza bati Kagame ni umukiza, ni umunyagitugu? Bakarangiza bavuga ko ari umunyagitugu… niba abaje hano n’abasabye referendum barabikoreshejwe ku gitutu, bene icyo cyaha ndacyemera. Icyo bibeshya ni uko bo badatora. Barabigerageje batoranya mu Banyarwanda uwo bashyira imbere ariko bakirengagiza ko badatora.”

11:50: Minisitiri w’Umuco na Siporo, Uwacu Julienne, ushinzwe ibikorwa byo kwamamaza bya FPR Inkotanyi ku rwego rw’igihugu niwe uhawe ikaze kugira ngo yakire Perezida Kagame.

Minisitiri Uwacu ati “Uri umukandida Abanyarwanda, abanyamuryango bihitiyemo kubera ibigwi byanyu … twe umuryango wa FPR Inkotanyi uyu ni umwanya wo kwishimira ibyo twagezeho mu myaka irindwi ishize”.

11:35: Ndamyuwera Jean Sauveur, usanzwe ari umurinzi w’igihango niwe uhawe umwanya kugira ngo atange ubuhamya. Avuze ko yari umucuruzi wa caguwa n’ibiribwa mbere ya Jenoside, ariko icyo gihe nta mutekano wari uhari kuko ngo nubwo yari afite moto, yashoboraga kuyitwara akabizira.

11:25: Perezida Kagame amaze kugera ku kibuga cya Kibingo aho ari kuramutsa abantu benshi baje kumushyigikira mu rugendo rwo kwiyamamariza kuyobora u Rwanda.

Abantu benshi bamwakirije amashyi n’impundu, abari bafite amabendera y’Umuryango FPR Inkotanyi bayazamura mu kirere bamushimira ibyo u Rwanda rumaze kugeraho rurangajwe imbere na we.

Perezida Kagame yavuze ko amashuri atanga uburezi bufite ireme, amavuriro atuma ubuzima bw’Abanyarwanda buzira umuze n’ibikorwaremezo bigasagamba aribyo bakwiriye

Perezida Kagame akigera ku kibuga cya Kibingo yasuhuje imbaga y’abaturage bari bahateraniye

Abanyamuryango ba FPR Inkotanyi bakiriye umukandida wabo mu byishimo by’ikirenga baje kumva imigabo n’imigambi ye bishya

11:20: Mu minota mike, Perezida Kagame araba asesekaye aha mu Karere ka Ruhango aho ibikorwa bye byo kwiyamamaza bigiye gutangirira. Hagati aho, abahanzi barimo Mariya Yohana nibo bari gususurutsa abanyamuryango ba FPR Inkotanyi.

Umuhanzikazi Mariya Yohana mu bari kwamamaza Perezida Kagame

-  Dr Vincent Biruta, Perezida wa PSD, ishyaka ryatanze Paul Kagame nk’umukandida nawe ni umwe mu bitabiriye ibi bikorwa byo kwiyamamaza by’umukandida wa FPR Inkotanyi

Perezida w’Ishyaka Riharanira Demokarasi n’Imibereho Myiza y’Abaturage (PSD),Dr Vincent Biruta, yitabiriye ibikorwa byo kwiyamamaza by’umukandida wa FPR Inkotanyi bashyigikiye mu matora

-  Perezida w’Inteko Ishinga Amategeko Umutwe w’Abadepite, Mukabalisa Donatille, akaba n’Umuyobozi wa PL ishyaka naryo ryatanze Paul Kagame nk’umukandida nawe yitabiriye iki gikorwa. Yaserutse yambaye umwambaro w’ishyaka rye ariko uriho ifoto ya Perezida Kagame.

Umuyobozi w’Ishyaka riharanira kwishyira ukizana kwa muntu (PL), Mukabalisa Donatille wambaye umupira uriho ifoto ya Perezida Kagame batanze nk’umukandida ubahagarariye na Guverineri w’Intara y’Amajyepfo, Mureshyankwano Marie Rose bari babyambariye

Bati “FPR, Umuryango w’Abanyarwanda waharaniye kera kuzarurengera, amaboko yacu azakorera u Rwanda”

10:30: Abahanzi batandukanye barimo Dream Boys, Jay Polly, Butera Knowless, Tom Close, Urban Boys n’abandi nibo bari gususurutsa ibihumbi by’abanyamuryango ba FPR Inkotanyi byitabiriye uyu munsi. Abenshi bitabiriye iki gikorwa, bambaye imyenda igaragaza ibirango bya FPR Inkotanyi n’amabendera yayo.

Abahanzi batandukanye biganjemo abegukanye irushanwa rya PGGSS mu myaka irindwi ishize, basusurukije abitabiriye ibikorwa byo kwiyamamaza kwa Perezida Kagame mu Karere ka Ruhango

Indirimbo ziri kuririmbwa ziganjemo izamamaza Perezida Kagame uretse ko abahanzi bari kunyuzamo bakanaririmba izabo basanzwe bazwiho.

N’abakecuru bakuze baje gushyigikira Perezida Kagame, umukandida FPR Inkotanyi

Abanyamuryango ba FPR Inkotanyi baturutse mu bice bitandukanye mu Karere ka Ruhango bari babukereye baje gushyigikira Perezida Kagame

Abaturage benshi bari buzuye ku kibuga cya Kibingo mu Karere ka Ruhango

Abarirwa mu bihumbi bari bafite akanyamuneza ko kwakira umukandida wa FPR Inkotanyi

Buri wese yari yitwaje ibendera ry’Umuryango FPR Inkotanyi mu gushyigikira umukandida wayo

Amafoto: Mahoro Luqman na Nkurunziza Faustin

SRC: IGIHE

Uruhurirane rw’ibitaramo rwafashije abakundana kwizihirwa na St Valentin (Amafoto)
Perezida Kagame yemeye ko referandumu yaba ku ya 18 Ukuboza
Uganda yataye muri yombi umwe mu bayobozi ba FDLR
Nyuma y’urugomo muri Zambia, Abanyarwanda bahungiye kuri ambasade

Tanga igitekerezo

Kwamamaza

Developed by Amitabha Technology, Inc.