DOVE MAGAZINE
DOVE RECORDS, INC.

Ubuhinzi bw’u Rwanda bwatewe inkunga ya miliyari 173

Guverinoma y’u Rwanda yasinyanye n’Umuryango w’Ubumwe bw’Ibihugu by’i Burayi (EU) inkunga ingana n’amayero miliyoni 200, ni ukuvuga amafaranga y’u Rwanda miliyari 173 azakoreshwa mu rwego rw’ubuhinzi.

Aya masezerano yashyizweho umukono ejo hashize ku wa Kane tariki ya 23 Kamena 2016, ku ruhande rw’u Rwanda na Minisitiri w’Imari n’Igenamigambi Amb. Claver Gatete, na ho ku ruhande rwa EU ashyirwaho umukono na Amb. Michael Ryan uyihagarariye mu Rwanda.

Uyu muhango kandi wari wanitabiriwe na Minisitiri w’Ubuhinzi n’Ubworozi, Dr Geraldine Mukeshimana.

Minisitiri w’Imari n’Igenamigambi Amb. Claver

Minisitiri w’Imari n’Igenamigambi Amb. Claver Gatete na Amb. Michael Ryan uhagarariye EU mu Rwanda (Foto James R.)

Minisitiri Gatete yavuze ko azakoreshwa muri gahunda za Guverinoma zo guteza imbere imirire myiza mu banyarwanda, kwihaza mu biribwa, no kuhira imyaka ikagera ku banyarwanda benshi.

Aya mafaranga kandi azakoreshwa mu gutera ibiti bivangwa n’imyaka imusozi no guca amaterasi, guhanga imirimo mu bahinzi bakora ubuhinzi bw’ibyoherezwa mu mahanga, gutunganya umusaruro n’ibindi.

Minisitiri Gatete yasobanuye ko u Rwanda rwateye intambwe mu guhindura urwego rw’ubuhinzi.

Ati “Iyi nkunga izafasha mu mpinduka zikomeje muri uru rwego hatezwa imbere uburyo bugezweho bw’ubuhinzi, hihazwa mu biribwa hahangwa n’imirimo mishya”.

Amb. Michael Ryan yavuze ko banezezwa no gutera inkunga politiki na gahunda bya Leta mu buhinzi, hatezwa imbere Abanyarwanda mu kugera ku cyerekezo cyabo.

Ryan ati “Kimwe cya gatatu cy’umusaruro mbumbe w’ubukungu bw’u Rwanda, kiva mu buhinzi. Ibi ni iby’agaciro ku rwego rurimo Abanyarwanda bangana na 80% babeshwaho n’ubuhinzi.”

Amb. Ryan uvuga ko iyi nkunga izagirira akamaro kanini ubuhinzi, yavuze ko ari yo ya mbere nini batanze ku Rwanda.

Ati “Iyi ni yo nkunga ya mbere nini EU ihaye u Rwanda. Izafasha gahunda zateguwe na Guverinoma mu cyerekezo cyayo cyo gukora ubuhinzi bugamije isoko, no kuzamura imibereho myiza y’Abanyarwanda.”

Umuryango w’Ubumwe bw’Ibihugu by’i Burayi usanzwe utera inkunga u Rwanda mu rwego rw’ingufu, ubuhinzi, n’izindi. Uyu muryango ukaba ari umwe mu bafatanyabikorwa mu iterambere ba Leta y’u Rwanda.


SRC:IMVAHO NSHYA

Impuguke zarangije iperereza kuri FDLR mu Burundi
Rusizi: Abana bacika ababyeyi bakajya gusabiriza
Mali izacakirana na Kongo Kinshasa ku mukino wa nyuma wa CHAN
Kirehe nanone havutse umwana ufite imitwe ibiri

Tanga igitekerezo

Kwamamaza

Developed by Amitabha Technology, Inc.