DOVE MAGAZINE

U Burusiya bwivanye muri ICC buvuga ko nta cyizere igifitiwe

Perezida w’u Burusiya, Vladmir Putin kuri uyu wa Gatatu yasinye iteka rivana igihugu cye mu masezerano yashyizeho Urukiko Mpuzamahanga Mpanabyaha, ICC, umwanzuro ukurikiye uw’ibindi bihugu bya Afurika biri kwivanamo umusubizo.

Mu 2000 nibwo u Burusiya bwashyize umukono ku masezerano yemeza ishyirwaho rya ICC ndetse itangira imirimo mu Buholandi mu 2002, ariko icyo gihugu nticyigeze kiyemeza burundu.

Leta ya Moscow yavuze ko idashimishijwe n’uko ICC ibibazo biyireba birimo intambara yabuhuje na Georgia mu 2008, ariko ikirengagiza ubushotoranyi icyo gihugu cyakoze ku baturage bo mu Majyepfo ya Ossetia, agace kamwe ka Georgia ariko gashyigikiye ubuyobozi bw’u Burusiya.

Ku bw’ibyo ngo u Burusiya “ntibwagira icyizere mu Rukiko Mpuzamahanga Mpanabyaha” nk’uko Minisiteri y’Ububanyi n’amahanga yabitangaje, kandi ngo uwo mwanzuro wafashwe na Perezida Putin ubwe.

Iri teka rya Perezida Putin ryasohotse nyuma y’uko Inteko Rusange y’Umuryango w’Abibumbye yari yasohoye n’umwanzuro wamagana uko u Burusiya kuva mu 2014 buri kugenzura agace ka Crimea kahoze kuri Ukraine, ndetse bukaba bukora ibyaha bihungabanya uburenganzira bwa muntu kuri bamwe mu bahatuye.

Reuters yatangaje ko kuwa Mbere w’iki cyumweru Ubushinjacyaha bwa ICC bwari bwanasohoye raporo ishinja u Burusiya gushoza amakimbirane akoreshwamo intwaro muri Crimea mu 2014.

Si ibyo gusa kuko u Burusiya buri ku gitutu mpuzamahanga kubera ibitero by’indege buri kugaba muri Syria, aho imiryango iharanira uburenganzira bwa muntu hamwe n’abayobozi ba Leta Zunze Ubumwe za Amerika bari gusaba ko bukorwaho iperereza, babushinja gusuka ibisasu ku basivili muri Aleppo.

Perezida w’u Bufaransa, François Hollande, nawe yaherukaga kuvuga ko u Burusiya bukwiye gukurikiranwa n’inkiko zirimo ICC ku byaha by’intambara kubera ibyo buri gukora muri Syria, cyane muri Aleppo iri mu maboko y’inyeshyamba zirwanya Perezida Bashar Al Assad.

Minisiteri y’Ububanyi n’Amahanga yatangaje iti “Ikibabaje ni uko urwo rukiko rutigeze rutanga icyizere mu mikorere rwari rwitezweho, kandi ntirwabaye urwego rwigenga rw’ubucamanza mpuzamahanga.’’

“Ikigaragara ni uko mu myaka 14 imaze ikora, ICC yaciye imanza enye gusa kandi igakoresha asaga miliyari $1.”

Iki gihugu cyashimangiye ko gishyigikiye ko abakora ibyaha ndengakamere bagomba kubibazwa, bikagaragazwa n’uko bwagize uruhare mu ishyirwaho ry’amategeko ahana icyaha cya Jenoside, ibyaha by’intambara n’ibyibasiye inyokomuntu.

Umuvugizi wa Kremlin, Dmitry Peskov yabwiye itangazamakuru ko uyu mwanzuro “uri mu nyungu z’igihugu” kandi ntacyo ubangamiye mu butabera.

Ibihugu byinshi muri Afurika byakunze kuvuga ko uru rukiko ari igikoresho cy’Abanyaburayi kigamije kwibasira abayobozi kuri uyu mugabane, bikaba byarahise bitangira kwivanamo, ibiheruka bikaba ari Gambia, Afurika y’Epfo n’u Burundi.

Perezida w’u Burusiya, Vladmir Putin yasinye iteka rivana igihugu cye mu masezerano yashyizeho ICC


SRC: IGIHE

Kapiteni wa Rayon Sports, Fuadi Ndayisenga agiye gushinga urugo
Perezida Kagame yahawe igihembo cy’umukuru w’igihugu wagize uruhare mu guteza imbere ikoranabuhanga
Miss Carine Rusaro yashyingiwe
Maj. wari ushinzwe ubutasi no gutegurira FDLR urugamba yatashye mu Rwanda

Tanga igitekerezo

Kwamamaza

Developed by Amitabha Technology, Inc.