DOVE MAGAZINE

Tuyisenge na Kagere bambuwe igikombe na mukeba

KAC Kénitra yo muri Maroc yaguze myugaruro w’Amavubi, Bayisenge Emery ikomeje kugorwa no kubona intsinzi kuko yongeye gutsindwa na Wydad Casablanca igitego kimwe ku busa, naho Tuyisenge Jacques na Kagere Meddie batsindira Gor Mahia ariko ibura igikombe cya shampiyona.

Kugeza ku munsi wa munani wa shampiyona yo muri Maroc, ikipe ya KAC Kénitra ikinamo Bayisenge Emery iri ku mwanya wa nyuma n’amanota ane gusa n’umwenda w’ibitego icyenda irushwa na Wydad Casablanca ya mbere amanota 15.

Nyuma yo gutakaza amanota atatu mu mpera z’iki Cyumweru, KAC Kénitra isa n’iri mu mazi abira kuko ishobora kujya mu cyiciro cya kabiri mu gihe nta cyo yaba itisubiyeho.

Muri Kenya, ba rutahizamu babiri b’Abanyarwanda bakinira Gor Mahia, Tuyisenge Jacques na Kagere Meddie bitwaye neza batsinda ibitego 2-0 iyi kipe yatsinze Muhoroni Youth ariko ntibyagira icyo biyimarira kuko nyuma y’aho Tusker bari bahanganiye igikombe itsindiye AFC Leopards 1-0, yahise icyegukana.

Mu gihe hasigaye umukino umwe w’umunsi wa nyuma muri shampiyona mu mukino uzahuza aya makipe yombi, Tusker ifite amanota 58 mu gihe Gor Mahia yari ifite 54, bivuze ko n’iyo yayitsinda ku mukino wa nyuma yagira amanota 57 igasigara irushwa inota rimwe.

Muri Tanzania ho Young Africans ya Haruna Niyonzima yatsinze Tanzania Prisons igitego 1-0 igira amanota 30 igabanya ikinyuranyo cyari hagati yayo na mukeba w’ibihe byose, Simba, ifite amanota 35 nyuma y’umunsi wa 15 wa shampiyona.

Azam ya Mugiraneza Jean Baptiste “Migi” yari imaze imikino itatu yitwara neza, kuri iki Cyumweru ntiyahiriwe imbere ya Mbao kuko yatsinzwe 2-1.

Ni umukino Migi atigeze agaragaramo kuko yari yasabye uruhushya rwo kujya kwita ku umugore we, Gisa Fausta, wibarutse undi mwana w’umukobwa kuri iki Cyumweru nyuma y’imfura yabo yari yavutse muri Kamena 2015.

I Burayi, MFK Topvar Topoľčany ya Iranzi Jean Claude, Ombolenga Fitina na Kalisa Rachid yatsinze Spartak Trnava C ibitego 2-0 ifata umwanya wa kane n’amanota 32 irushwa atanu na Púchov ya mbere.

 

Tuyisenge na Kagere Meddie batsindiye Gor Mahia ariko ibura igikombe cya shampiyona
Tuyisenge na Kagere Meddie batsindiye Gor Mahia ariko ibura igikombe cya shampiyona


 

SRC: IGIHE

Serena Williams yongeye kwerekana icyo ashoboye
BURERA: Bafite umukoro bagomba gusubiza ku isuku
Uretse Fabregas reba abandi 3 Mourinho yatangajeko bari kumutsindisha
Ntaganzwa Ladislas ushinjwa ibyaha bya Jenoside yashyikirijwe urukiko

Tanga igitekerezo

Kwamamaza

Developed by Amitabha Technology, Inc.