DOVE MAGAZINE

Tour du Rwanda 2016:Abanya-Canada babimburiye abandi kugera i Kigali

 

Ikipe ya Lowest Rates Cycling yo muri Canada ni yo yageze ku butaka bw’u Rwanda mbere y’izindi 14 zizaturuka hanze, zije kwitabira Tour du Rwanda 2016 izatangira kuri iki Cyumweru tariki ya 13 Ugushyingo.

Amakipe 17 arimo atatu y’u Rwanda, ni yo biteganyijwe ko azitabira iri siganwa rizaba rizenguruka igihugu ku nshuro ya munani nyuma yo kugirwa mpuzamahanga rigashyirwa ku ngengabihe y’impuzamashyirahamwe y’umukino w’amagare ku isi, UCI.

Inzira ya Tour du Rwanda 2016

Ku nshuro ya mbere, u Rwanda ruzaba ruhagarariwe n’amakipe abiri asanzwe ndetse n’ikipe imwe y’igihugu, aho guhagararirwa n’amakipe atatu y’igihugu nkuko byari bimeze mu myaka irindwi itambutse. Aya makipe ya Benediction Club na Les Amis Sportives, wongeyeho n’ikipe y’igihugu, biteganyijwe ko zizagera i Kigali kuri uyu wa gatanu tariki ya 11 Ugushyingo, bitegura agace kabanziriza utundi, prologue, kazaba gakinirwa kuri stade Amahoro ku Cyumweru.

Kugeza ubu, ikipe imwe muri 17 zizitabira Tour du Rwanda ni yo yamaze kugera i Kigali, Lowest Rates Cycling yo muri Canada. Kuri uyu wa Kane, biteganyijwe ko amakipe yandi abiri ya Haute savoie yo mu Bufaransa(21 :35’) na Meubles Descartes yo mu Busuwisi(21 :35’) na yo azaba ageze mu murwa mukuru w’u Rwanda yitegura iminsi umunani y’iri rushanwa riza mu ya mbere kuri uyu mugabane.

Bukeye bwaho kuwa Gatanu, amakipe ya SNH yo muri Cameroun, Bike Aid yo mu Budage na Dimension Data ihabwa n’amahirwe yo kuzavamo uzegukana iri rushanwa, na yo azaba ageze mu Rwanda, akazahurira i Kigali na bamwe mu bakinnyi bayo bari mu Rwanda, Ndayisenga Valens wa Dimension Data na Bosco Nsengimana wa Bike Aid.

Abakinnyi bazitabira Tour du Rwanda 2016

Ubwo IGIHE yasuraga Team Rwanda aho imaze iminsi ikambitse i Musanze, Umutoza Jock Boyer ubana n’aba bakinnyi umunsi ku munsi na we yadutangarije ko akurikije uko abakinnyi bameze, Tour du Rwanda ya 2016 ishobora kuzasiga isura nshya y’uyu mukino mu banyarwanda n’abazayikurikirana bose.

Ati “Uyu mwaka amakipe arakomeye cyane. Hari Dimension Data izazana abasore nka Valens (Ndayisenga), Bike Aid ya Bosco (Nsengimana), hari ikipe yo muri Canada kandi nziza n’andi menshi kandi yose arashaka gutsinda. Ndakeka ko iri rizaba irushanwa rya mbere ryiza cyane kuko harimo n’inzira ebyiri nshya kandi zizaryohera abantu.”

Tour du Rwanda 2016, ifite umwihariko w’uko mu bakinnyi 84 bazayitabira, harimo babiri begukanye iri siganwa mu myaka itambutse. Aba, ni Nsengimana Jean Bosco waritwaye mu mwaka ushize wa 2015 na Ndayisenga Valens waryegukanye muri 2014. Mu bandi baritwaye hambere, ni Adil Jelloul (2009), Daniel Teklehaymanot(2010), Kiel Reijnen(2011), Darren Lill(2012) na Dylan Girdlestone muri 2013.

Ndayisenga Valens wegukanye Tour du Rwanda 2014, aza akinira Dimension Data uyu mwaka


SRC:IGIHE

 

Kaminuza ya ‘UTB’ yahoze ari RTUC igiye gutora Rudasumbwa na Nyampinga 2016
Lionel Messi, nyuma yo kuva mubibazo yahinduye umusatsi we
Arambiwe kumesa imyenda y’imbere y’abakoresha be, aragisha inama
Kidum ntatewe ubwoba n’abashobora kumwicira i Burundi

Tanga igitekerezo

Kwamamaza

Developed by Amitabha Technology, Inc.