DOVE MAGAZINE

Seyoboka Henri Jean Claude ukekwaho Jenoside yoherejwe mu Rwanda

Ubushinjacyaha bw’u Rwanda bwemeje ko Seyoboka Henri Jean Claude ukekwaho ibyaha bya Jenoside, agera ku kibuga mpuzamahanga cya Kigali ku isaha ya saa sita z’amanywa yoherejwe na Canada ngo aburanishwe ku byaha akekwaho gukorera mu yahoze ari Perefegitura ya Kigali.

Mu 1996 nibwo Seyoboka w’imyaka 50 yahawe sitati y’ubuhunzi na Canada ariko nyuma y’imyaka 10 ikurwaho bitewe n’ibyaha bya Jenoside n’ibyibasiye inyokomuntu yakekwagaho.

Ubushinjacyaha bw’u Rwanda bushinja Seyoboka ibyaha bitatu birimo icya Jenoside, icyo kurimbura imbaga n’icyibasiye inyokomuntu bikekwa ko yakoreye ahahoze ari muri segiteri ya Rugenge, Komini ya Nyarugenge ubu ni mu mujyi wa Kigali.

Ashinjwa kuba yararindaga Bariyeri ziciweho Abatutsi batandukanye bari batuye muri ako gace.

Seyoboka yoherejwe mu Rwanda ngo aburane ku byaha bya Jenoside nyuma ya Dr.Leon Mugesera uheruka gukatirwa gufungwa burundu.

Yagiye muri Canada nyuma yo gutoroka igisirikare cya EX-FAR akanyura muri RDC. Yasabye kujya muri Canada muri Kamena 1994 ngo asange umugore n’umuhungu we bari batuyeyo. Mu 1995 yabonye pasiporo mpimbano yamugejeje muri Canada ahita yaka ubuhunzi ariko ahisha ko yari umusirikare.

Yatangiye gukurikiranwa muri 1998 nyuma yo gutangwaho ubuhamya mu rukiko mpuzamahanga mpanabyaha (ICTR). Mu 2002 nibwo ICTR yamumenyesheje ko hari umutangabuhamya wamushinje ko yishe umuturanyi we w’umugore n’abana be babiri muri Jenoside, nyuma y’uko yanze ko basambanira kuri bariyeri.

Seyoboka mu gisirikare yari afite ipeti rya Lieutenant. Yakatiwe n’Urukiko Gacaca rwa Nyarugenge mu Mujyi wa Kigali igifungo cy’imyaka cumi n’icyenda (19) adahari.

Kuva mu 2006 hariho gahunda yo kohereza Seyoboka mu Rwanda ariko kuwa 19 Gicurasi uyu mwaka nibwo Ibiro bishinzwe abinjira n’abasohoka muri Canada byafashe umwanzuro ntakuka wo kumwohereza, ngo aburanishwe ku byaha akekwaho.

 

Henri Jean Claude Seyoboka
Henri Jean Claude Seyoboka


 

SRC: IGIHE

Abanyarwanda baba mu Butaliyani bashinze Umuryango "IBUKA Section ITALIA"
Obama yakokodesheje inzu azabamo ubwo manda ye ya kabiri izaba irangiye
Polisi yahakanye guta muri yombi umuyobozi wa RAB
Ibizamini byagaragaje ko umunyemari Makuza yahitanwe n’indwara y’umwijima

Tanga igitekerezo

Kwamamaza

Developed by Amitabha Technology, Inc.