DOVE MAGAZINE

Rusizi: Abaturage bataye muri yombi ufatwa nk’umukuru w’abajura

Abaturage batuye mu mujyi wa Rusizi, abahagenda n’abahakorera ibikorwa bitandukanye, barishimira ko ubujura bwari bwarahayogoje bushobora kugabanuka, kuko umujura wafatwaga nk’ukuriye abandi yatawe muri yombi.

Itabwa muri yombi ry’umusore witwa Niyibizi Théogène, abaturage bemeza ko yari yarabazengereje abiba, rije rikurikira umukwabu uherutse gufatirwamo inzererezi 25, ziganjemo abajura.

Niyibizi uvuga ko afite imyaka 25 y’amavuko, asanzwe azwi na benshi mu bujura muri uyu mujyi, kuko ari umujura ukomeye, ndetse bivugwa ko yaba afite n’ikipe y’abajura benshi ayoboye, biba mu mujyi ku manywa y’ihangu na nijoro.

Niyibizi yafatiwe ku muryango w’inzu

Niyibizi yafatiwe ku muryango w’inzu ashinjwa kwibamo (Foto Bahuwiyongera S)

Kubw’amahirwe make, uyu musore yatawe muri yombi n’abaturage, nyuma yo kwiba mu nzu itunganyirizwamo amafoto muri uyu mujyi, yajya gucika agasanga bamutangatanze.

Ambazamariya Ernestine, ukorera muri iyo nzu ikorerwamo akazi ko gufotora, yabwiye Imvaho Nshya ko uyu musore yabibye umugono kubera abantu benshi bakorera muri iyi nzu, araza aterura bimwe mu byarimo, afatwa atararenga umutaru.

Yagize ati:“Aba bajura barakabije rwose kuko n’ejobundi bibye umusaza mubatesheje bavuga ko najye bazanyereka, none dore baje kunyiba kandi barazwi, ariko bameze nk’abadakorwaho.”
Nambajimana Jean Bosco, usanzwe acururiza aho bita muri Matewusi, yemeza ko abajura bo muri uyu mujyi bafite ishyirahamwe bakoreramo riyoborwa n’uyu musore wafashwe, agasaba ko uwafashwe yajya ahanwa bikomeye, kuko kubafata bagahita barekurwa bitiza umurindi ubujura.

Yagize ati:“Aba bajura bafite ikintu kimeze nk’ishyirahamwe bakoreramo kandi turabazi rwos,e ariko kuko tubageza kuri Polisi bagahita barekurwa ahubwo bakatwigambaho, tumeze nk’ababaretse.

Nubwo bari babaye nk’abagabanyuka kuko amakamyo bihishagamo yari yakuwe mu mujyi rwagati ku manywa, ariko n’ubundi batwiba mu mangazini ku manywa y’ihangu, twayobewe icyo twakora.”

Nyuma yo gutabwa muri yombi, Niyibizi yavuze ko amaze igihe kirekire yiba muri uyu mujyi, akaba yaranabifatiwemo ajyanwa ku kirwa cya Iwawa umwaka ushize yiga imyuga ariko ngo ntiyashoboye kubyaza umusaruro ibyo yize bituma yongera kwisanga imibereho ye ishingiye ku bujura.

Yagize ati:“Naje niyemeje kureka ubujura, ariko ibyo bari batwijeje tuva Iwawa akarere ka Rusizi nta na kimwe kaduhaye nk’abandi, nta gikoresho na kimwe twabonye, kandi nari nize ububaji nje gukora nkava mu bujura, ariko nabuze ikindi nkora kandi sinakwicwa n’inzara abafite amafaranga bakomeza ku ntambukaho.”

Umunyamabanga Nshingwabikorwa w’umurenge wa Kamembe Ntivuguruzwa Gervais, avuga ko abenshi muri aba bajura bazwi, bakaba bariyemeje kubahashya, abafashwe bakajyanwa kwiga ibibafitiye akamaro.


 

SRC: IMVAHO NSHYA

Urban Boyz yasezeye muri Primus Guma Guma Super Star
Ibyegera bya Apotre Gitwaza birabeshyuza amakuru avuga ko hari abashaka kumweguza
Perezida Kabila yashyize Papa Wemba mu ntwari z’igihugu
Rihanna yasutse amarira mugitaramo i Dublin

Tanga igitekerezo

Kwamamaza

Developed by Amitabha Technology, Inc.