DOVE MAGAZINE

RDC: Ikibazo cy’ingengabihe y’amatora kiragarukwaho by’umwihariko mu biganiro by’amahoro

Mu gihe ibiganiro by’amahoro muri Repubulika Iharanira Demokarasi ya Congo (RDC) bihuje Leta n’abatavuga rumwe nayo bikomeje, kuri uyu wa Mbere haribandwa ku kibazo cy’ingengabihe y’amatora.

Ibi biganiro byatangiye ku itariki ya 1 Nzeri 2016, byagombaga gusozwa ku wa Gatandatu w’icyumweru gishize ariko bemeza ko bikomeza kuri uyu wa Mbere kuko ikibazo cy’ingengabihe y’amatora idakomeje kuvugwaho rumwe kitarabonerwa umuti.

Nubwo ariko ibiganiro biri bukomeze, uruhande rw’abanze kubyitabira barimo ihuriro ry’amashyaka atavuga rumwe na leta, sosiyete sivile n’indi miryango iharanira uburenganzira bw’abaturage yateguye imyigaragambyo.

Uru ruhande ruvuga ko mu gihe habura umunsi umwe ngo itariki ntarengwa yo gutangaza ingengabihe y’amatora ya perezida igere, bateganya guha Perezida Joseph Kabila amezi atatu yo kumwihanangiriza babinyujije mu myigaragambyo.

Ingengabihe yari yashyizwe ahagaragara na Komisiyo y’amatora yagaragaza ko Perezida, abagize Inteko Ishinga Amategeko n’abayobozi b’inzego z’ibanze bazatorwa mu mpera za 2018. Bivuze ko igihugu kizamara imyaka ibiri mu nzibacyuho.

Ibi ariko byamaganiwe kure n’abatavuga rumwe na leta n’inama nkuru y’Abepisikopi(Cenco).

Ibiganiro mpaka by’uyu munsi bikaba biri buce kuri televiziyo kugira ngo abaturage babashe gusobanukirwa neza uko iki kibazo giteye.

Umwe mu nararibonye za Cenco yabwiye Radio Mpuzamahanga y’Abafaransa, RFI ko bigishoboka kwigiza imbere itariki y’amatora, kugabanya umubare w’ibiro by’itora ndetse n’iminsi yo gutora ikaba ibiri.

Ku rundi ruhande ariko ihuriro ry’abashyigikiye Perezida Kabila, rishinja intumwa idasanzwe ya Leta Zunze Ubumwe za Amerika mu biyaga bigari, Tom Perriello gukora ibishoboka kugira ngo ibi biganiro by’amahoro ntibigere ku ntego zabyo.

Ibi iri huriro ribishingira ku kuba Perriello ari gukusanya miliyoni 50 z’amadorali yo kugura ibikoresho byifashishwa mu matora kugira ngo arebe ko byibura yaba mu 2017.

Itegeko Nshinga RDC igenderaho riteganya ko amatora ya Perezida yagakwiye kuba ku itariki 27 Ugushyingo, ni mu gihe manda ya Kabila ari nayo ya nyuma izarangira kuwa 20 Ukuboza 2016.

Abatavuga rumwe n'ubutegetsi bavuga ko Perezida Kabila ashaka kwiharira ubutegetsi
Abatavuga rumwe n’ubutegetsi bavuga ko Perezida Kabila ashaka kwiharira ubutegetsi


SRC: IGIHE

Perezida Kagame yashyizeho amabwiriza agenga umuvuduko ntarengwa
Gahunda yo guca ubuzererezi isa n’iyagonze urukuta
Umuvunyi yerekanye ko akarengane na Ruswa bishingiye ku "butaka" byafashe indi ntera
Amatora muri USA: Clinton na Trump bongeye kwanikira abandi no muri Arizona

Tanga igitekerezo

Kwamamaza

Developed by Amitabha Technology, Inc.