DOVE MAGAZINE

Rayon Sports yemeye miliyoni eshatu za APR FC ihara Imanishimwe Emmanuel

Ishyirahamwe ry’Umupira w’Amaguru mu Rwanda,Ferwafa, ryemeje ko Imanishimwe Emmanuel ari umukinnyi wa APR FC, rihita rinategeka iyi kipe kwishyura Rayon Sports bari bamuhanganiye miliyoni eshatu n’ibihumbi 200 y’amafaranga y’u Rwanda mu gihe kitarenze iminsi 30, Rayon Sports isabwa kwishyura miliyoni imwe kuri Nova Bayama na Rwigema Yves nk’indezo.

Ni ibyemezo byafashwe kuri uyu wa Kane, mu nama yabereye ku cyicaro cya Ferwafa iyobowe na Visi Perezida, Kayiranga Vedaste, yahuje APR FC yari ihagarariwe na Kalisa Adolphe ‘Camarade’ n’abayobozi bakuru ba Rayon Sports barimo Perezida Gacinya Denis n’Umunyamabanga Mukuru, Gakwaya Olivier yamaze hafi amasaha ane.

Impande zombi zemeranyijwe ko ikipe y’Ingabo z’Igihugu yegukana Imanishimwe wari umaze imyaka ibiri akinira Rayon Sports, naho iyi yemererwa kuzakinisha Nova Bayama na Rwigema Yves bakuriye muri APR FC ndetse bakaba bari bimwe ibyangombwa “release letter” ngo bemererwe kujya mu ikipe yambara ubururu n’umweru.

Nyuma y’iyo myanzuro, amakipe yombi yatangaje ko yanyuzwe kuko ibyo bagombaga gukora byose byari mu nyungu z’abakinnyi ndetse ari nayo mpamvu hirengagijwe ko Imanishimwe yasinyiye amakipe abiri ntiyagira ibihano afatirwa nk’uko amategeko abiteganya.

Amasezerano ya Imanishimwe yavugaga ko ikipe izamugura izaha Rayon Sports 40% by’amafaranga yamutanzweho. APR FC yamuguze miliyoni umunani yasabwe guha Rayon Sports miliyoni eshatu n’ibihumbi 200, irabyemera ndetse ihabwa iminsi 30 yo kuba yarangije kwishyura ikanasubiza miliyoni enye uyu mukinnyi yari yahawe na Rayon Sports ubwo yongeraga amasezerano.

Imanishimwe Emmanuel yasinyiye APR FC kuya 14 Nyakanga 2016, nyuma y’umunsi umwe ubuyobozi bwa Rayon Sports butangaje ko bwamaze kumwongerera amasezerano. Nyuma yo kumenya ko Imanishimwe yagiye muri APR FC, Rayon Sports yandikiye Ferwafa iyisaba kurenganurwa, igasubizwa umukinnyi wayo yari yaratijwe n’ikipe ya Aspor yo mu cyiciro cya kabiri ariko ntiyahita ihabwa igisubizo.

Kuri miliyoni enye APR FC yasabaga kuri Rwigema Yves na Nova Bayama kugira ngo yemere ko bakinira Rayon Sports, nyuma yo kuganira byemejwe ko iyi kipe y’i Nyanza izatanga ibihumbi 500 y’indezo kuri buri wese nkuko itegeko rya Ferwafa ribiteganya.

Undi mukinnyi wavuzwe cyane hagati y’aya makipe, Rwatubyaye Abdoul utazwi aho aherereye, Ferwafa yemeje ko kugeza ubu nta byangombwa bye birakorwa, ikuraho urujijo rw’abavugaga ko yamaze kubibona ndetse azakina ku mugabane w’u Burayi ahubwo ngo igihe cyose azabonekera nibwo ibibazo bye bizigwaho.

Kunyurwa n’ibyemezo byafatiwe muri iyi nama byatumye Rayon Sports yari yandikiye Ferwafa iyimenyesha ko itazakina umukino wa mbere wa shampiyona yisubiraho. Kuri uyu wa Gatanu iracakirana na Police FC kuri stade ya Kigali i Nyamirambo saa 18:00.

Imanishimwe Emmanuel (iburyo) amaze amezi atatu akora imyitozo muri APR FC

Nova Bayama(ibumoso) na Rwigema Yves bazakinira Rayon Sports

Ikibazo cya Rwatubyaye Abdoul(ibumoso) kizigwaho yabonetse


SRC: IGIHE

Rayon Sports yanganyirije i Rubavu, Kiyovu yandagaza Amagaju
Abatuye Indiana na Michigan batangiye icyunamo n’urugendo rwo kwibuka
Umusore wishe urugi rw’imodoka akibamo asaga miliyoni eshatu yafashwe
Rayon Sports yanyagiye Marines FC, ihita ifata umwanya wa mbere

Tanga igitekerezo

Kwamamaza

Developed by Amitabha Technology, Inc.