DOVE MAGAZINE

Rayon Sports yanyagiye Police FC 3-0 ku mukino ufungura shampiyona

Ibitego bibiri bya Nahimana Shasiir n’icya Kwizera Pierrot bifashije Rayon Sports gutangira shampiyona y’icyiciro cya mbere mu Rwanda ya 2016/2017 inyagira Police FC mu mukino wabereye kuri Stade ya Kigali ku mugoroba wo kuri uyu wa Gatanu.

Kuba Police FC imaze icyumweru cyose i Muhanga yaragiye mu mwiherero udasanzwe wo gutegura uyu mukino, ntibyabujije abasore ba Masoudi Djuma bakoze umwiherero w’umunsi umwe gusa gusubiramo ibimaze kuba akamenyero barayinyagira nk’uko byagenze mu mikino ine iheruka guhuza aya makipe.

Ni umukino watangiye Rayon Sports isatira bikomeye ndetse ku munota wa gatandatu ibona uburyo bukomeye nyuma yuko Nshuti Savio acenze ba myugariro ba Police FC ariko umupira Muhire Kevin akawutera hanze y’izamu rya Nzarora Marcel.

Rayon Sports yashakaga gushimisha abafana batagira uko bangana bari bayiri inyuma, yakomeje guhererekanya neza ari na ko ba rutahizamu bayobowe n’Umurundi Nahimana Shasiir basatira izamu rya Police FC.

Kwizera Pierrot ku munota wa 19 yafunguye amazamu nyuma y’umupira mwiza yari ahawe na Djabel Manishimwe wari umaze gucenga ba myugariro ba Police FC, umupira usanga Pierrot ahagaze wenyine ahita anyeganyeza inshundura.

Rayon Sports yahise itangira kwibona mu mukino ndetse ikomeza kotsa igitutu ab’inyuma ba Police FC, ihusha uburyo bwari bwabazwe.

Muhire Kevin yagize ikibazo cy’imvune ahita asimbuzwa ku munota wa 27 na Nova Bayama winjiye mu kibuga ahindura byinshi.

Mu gusatira kwa Rayon Sports, Savio Nshuyi yahawe ikarita y’umuhondo nyuma yo kugwa mu rubuga rw’amahina, benshi mu bafana ba Rayo Sports bakeka ko akorewe penaliti.

Iminota 45 y’igice cya mbere cy’umukino cyihariwe na Rayon Sports yarangiye, iyoboye n’igitego kimwe ku busa.

Igice cya kabiri cyatangiye Police FC igerageza gusatira ariko uburyo bwabonetse imbere y’izamu, rutahizamu Songa Isaie ntiyashobora kububyaza umusaruro.

Ku munota wa 65, Nahimana Shasiir yatsinze igitego cya kabiri ku mupira wari uvuye muri koroneri, abakinnyi bakawusiganira ugasanga uyu musore ahagaze wenyine, agahita awuboneza mu izamu.

Rayon Sports yahise ikomeza gusatira ariko umupira mwiza Nova Bayama yari ahawe na Irambona Eric awutera hejuru y’izamu.

Umutoza Seninga yakoze impinduka akuramo umusore Twagizimana Fabrice asimburwa na Japhet Umurora.

Ku rundi ruhande, Umutoza wa Rayon Sports, Masoudi yakuyemo Manishimwe Djabel ashyiramo Niyonzima Olivier Sefu mu rwego rwo gukomeza ubwugarizi bw’ikipe.

Police FC na yo yahise ikora impinduka ikuramo Mushimiyimana Muhammed, ishyiramo Hegman Ngomirakiza ishaka kugombora ariko bikomeza kunanirana.

Rayon Sports yabonye igitego cya gatatu ku munota wa 84 cyatsinzwe na Nahimana Shasiir wigaragaje cyane kuri uyu mukino, ku mupira mwiza yari ahawe na Nzayisenga Jean d’Amour. Uyu Murundi yahise anasimburwa na Lomami Frank.

Iminota 90 y’umukino yarangiye Rayon Sports iri imbere n’ibitego bitatu ihita iyobora urutonde rwa shampiyona y’icyiciro cya mbere.

Abakinnyi babanjemo ku mpande zombi:

Police FC: Nzarora Marcel, Ndayishimiye Celestin, Habimana Hussein, Innocent, Mushimiyimana Muhammed, Twagizimana Fabrice, Songa Isaie, Mwizerwa Amini, Ngendahimana Eric, Uwihoreye Jean Paul na Usengimana Danny.

Rayon Sports: Ndayishimiye Eric Bakame, Nzayisenga Jean d’Amour, Irambona Eric, Manzi Thierry, Mutsinzi Ange Jimmy, Mugheni Fabrice , Muhire Kevin, Kwizera Pierrot , Nshuti Dominique Savio, Nahimana Shasiir, na Manishimwe Djabel.

Abafana ba Rayon Sports bari bitwaje ikirago

Abafana ba Rayon Sports mu mifanire imenyerewe ku mugabane w’u Burayi

Abakinnyi ba Rayon Sports bishimira igitego cya mbere

Ngomirakiza Hegman(ibumoso)yabanje ku ntebe y’abasimbura

Imvune Muhire Kevin yagize yatumye ahita asimbuzwa

Nahimana Shasiir (ibumoso), watsinze ibitego bibiri na Muhire Kevin

Stade ya Kigali yari yakubise yuzuye

Umukino ufungura shampiyona warebwe n’abantu b’ingeri zose barimo n’Abera

Umutoza Masoudi Djuma wa Rayon Sports(ibumoso) na Seninga Innocent wa Police FC


SRC: IGIHE

Rayon Sports Volley Club yatsinze APR VC amaseti 3-0
Okoko ntaremera ko Umunyamabanga na Perezida ba Mukura VS beguye
Stromae yavugishije benshi kubera uburyo yihinduje (Amafoto)
Itariki yo gusimbuza Senateri Jean De Dieu Mucyo yamenyekanye

Tanga igitekerezo

Kwamamaza

Developed by Amitabha Technology, Inc.