DOVE MAGAZINE

Rayon Sports yanyagiye Marines FC, ihita ifata umwanya wa mbere

I Rubavu kuri Stade Umuganda, Rayon Sports yari yasuye Marines FC iyitsinda ibitego bitatu ku busa, harimo bibiri bya Kwizera Pierrot na Moussa Camara ihita ifata umwanya wa mbere ku rutonde rw’agateganyo mbere y’uko Sunrise FC ikina na Pépinière FC kuri iki Cyumweru.

Kuri iki kibuga gikunze kugora Rayon Sports cyane, kuri uyu wa Gatandatu tariki ya 5 Ugushyingo yagikiniyeho igaragaza inyota yo gushaka amanota hakiri kare ndetse biranayihira ku munota wa 24 ifungura amazamu ku gitego cyatsinzwe na Kwizera Pierrot.

Uyu Murundi watorewe kuba umukinnyi wahize abandi bose umwaka ushize w’imikino, yongeye gusubira Marines FC ku munota wa 38 kuri coup franc yateye umuzamu Faraji ntiyabasha kugarura umupira.

Mu gice cya kabiri abasore b’umutoza Nduhirabandi Abdoul Kalim bita Coka bagaragaje kwihagararaho nubwo igitutu cy’ubusatirizi bwa Rayon Sports buyobowe na Moussa Camara na Savio Nshuti Dominique bwakomeje kutaborohera. Ku munota wa 83, rutahizamu ukomoka muri Mali Moussa Camara yatsinze igitego cya gatatu.

Rayon Sports yahise ifata umwanya wa mbere n’amanota 10 n’ibitego umunani izigamye ariko ikaba igitegereje uko Sunrise FC ifite amanota icyenda, izitwara imbere ya Pepiniere FC kuri iki Cyumweru.

APR FC yari ihanganye na Rayon Sports yo yatakaje amanota abiri i Nyakinama aho yanganyije na Musanze FC ubusa ku busa.

AS Kigali yo ikomeje ibihe bitari byiza kuko yanganyije 0-0 na Bugesera FC i Nyamirambo, Mukura Victory Sports itsinda Kiyovu 2-1 mu gihe Espoir FC itaratsinda umukino n’umwe ariko nayo itaratsinda n’umwe muri shampiyona yanganyije n’Amagaju 1-1 i Rusizi.


SRC: IGIHE

Cameroun yihereranye u Rwanda mu mukino wa mbere wa gicuti
Mukura VS yicaye ku mwanya wa mbere
Manchester United yabujije Leicester kurara itwaye igikombe
Dore urutonde rw’ibyaha bine Umuyobozi Mukuru wa Musée n’umukozi wayo bakurikiranweho

Tanga igitekerezo

Kwamamaza

Developed by Amitabha Technology, Inc.