DOVE MAGAZINE

Rayon Sports yafatiye ibihano Kasirye, inerekana rutahizamu mushya

Mu muhango wo kwerekana rutahizamu mushya, Ismaila Diarra, Ubuyobozi bw’ikipe ya Rayon Sports bwatangaje ko bwamaze gufatira ibihano rutahizamu Davis Kasirye wari umaze kubatsindira ibitego bine kugeza ku munsi wa cyenda wa shampiyona.

Umunyamabanga w’ikipe ya Rayon Sports, Gakwaya Olivier wari kumwe n’umutoza mukuru, Ivan Minaert ndetse na kapiteni Ndayishimiye Eric, yatangaje ko bitewe no kutubahiriza amasezerano afitanye n’ikipe, Kasirye Davis yamaze gushyikirizwa ibaruwa imuhagarika bikaba byaramenyeshejwe Ishyirahamwe ry’umupira w’amaguru mu Rwanda ndetse n’iryo muri Uganda aho akomoka.

Gakwaya yagize ati “Yamaze gushyikirizwa ibaruwa imuhagarika kandi twabimenyesheje Ishyirahamwe ry’umupira w’amaguru mu Rwanda no muri Uganda.”

Gakwaya yavuze kandi ko ibyo Kasirye yagiye atangaza ko hari amafaranga ikipe imubereyemo, ari ibinyoma kuko yahembwe kimwe n’abandi ubwo iyo kipe yishyuraga abakinnyi ibirarane yari ibafitiye.

Gakwaya yanavuguruje ibimaze iminsi bivugwa ko hari amakipe yandi yageze kuri Rayon Sports ashaka kugura Kasirye wagaragaje ko atacyifuza gukinira iyo kipe.

Kasirye aheruka kugaragara muri Rayon Sports umwaka ushize mbere y’uko shampiyona ihagarara. Ntiyigeze akina mu irushanwa ryari ryateguwe n’iyo kipe ifatanyije na Star Times.

Ku bijyanye n’umukinnyi Kwizera Pierrot, Gakwaya yavuze ko we nubwo ataragera mu myitozo, ariko avugana n’ikipe akaba agifite ibibazo bye bwite ariko azagaruka.

Rutahizamu mushya wa Rayon Sports, Ismaila Diarra

Rayon Sports ifite umukino kuwa Gatanu na Gicumbi FC, yanerekanye rutahizamu mushya yavanye muri Maroc ariko ukomoka muri Mali, Ismaila Diarra wahawe amasezerano y’amezi atandatu, aho aje kuyifasha gukomeza guhatanira igikombe cya shampiyona, dore ko kugeza ubu irushwa amanota atatu gusa na AS Kigali iri ku isonga.

Rayon Sports ubusanzwe yabarizwaga i Nyanza, kuri ubu isigaye ikorera imyitoza i Kigali muri Cercle Sportif mu Rugunga.

Abakinnyi 18 Rayon Sports igiye gusubukurana shampiyona:

Ndayishimiye Jean Luc Bakame, Munezero Fiston, Manzi Thierry, Mugenzi Cedric, Tubane James, Muhire Kevin, Manishimwe Djabel, Niyonkuru Vivien, Imanishimwe Emmanuel, Mugeni Fabrice, Ndacyayisenga Alexis, Nsengiyumva Moustapha, Niyonzima Olivier Sefu, Mugisha François Matser, Gahonzire Olave, Nshuti Dominique Savio, Bashunga Abouba na Ismaila Diarra.

Gakwaya yavuze ko ikipe irimo gukora ibishoboka byose ngo ikemure n’ibibazo by’ibirarane by’abakinnyi

Bakame (Iburyo) Gakwaya (Hagati) ndetse n’umutoza Ivan mu kiganiro n’abanyamakuru

Diarra yarambagijwe n’umutoza Ivan Minaert

Umutoza Ivan niwe warambagije rutahizamu Diarra ugiye gufasha Rayon Sports kurwanira igikombe cya shampiyona


SRC: IGIHE

Perezida Kagame yabwiye abagiye gusembera i Burayi ko u Rwanda rutigeze ruba ruto
Barifuza gutangiza mu Rwanda banki igendera ku mahame y’idini ya Islam iziririza inyungu
Mu Rwanda hari umubare utari muto w’abana badindiye mu bwonko bavuka kubera kurangaranwa
Minisitiri Mushikiwabo yatumiwe mu nama y’Abanyarwandakazi b’i mahanga

Tanga igitekerezo

Kwamamaza

Developed by Amitabha Technology, Inc.