DOVE MAGAZINE

Ku myaka 50, Sembagare wamamaye muri Rayon Sports aracyari ingaragu

Hari ibihe bitazibagirana mu mupira w’amaguru mu Rwanda, abakinnyi bariyerekanye karahava, abafana barizihirwa batangira kubaririmba amanywa na n’ijoro kubera amacenga, amashoti, ubuhanga ndetse n’umurava byabarangaga mu kibuga bikabageza no ku ntsinzi.

Abakunzi b’umupira w’amaguru mu Rwanda by’umwihariko abafana ba Rayon Sports, mu byiciro byose yaba abakuru n’abato izina Sembagare Jean Chrysostome si rishya mu matwi yabo bitewe n’uburyo yigaragaje muri iyi kipe mu myaka yo hambere.

Ubuhanga bwe bwabaye inkuru kimomo ahantu hose ndetse n’abahanzi batangira kubokomozaho mu ndirimbo ya Rayon sports yitwa ‘Mbabarira’ igira iti “…Sembagare yabwiye Rongin ati gutsinda Rayon Sports ndabizi bigomba ubuhanga…”

Gusa aba bakinnyi hari ubuzima babayemo bitandukanye n’ibibera cyangwa byabereye mu kibuga.

Sembagare wamenyekanye cyane kuva mu 1984 ubwo yatangiraga gukina umupira w’amaguru mu cyiciro cya mbere mu Rwanda yeruye avuga ko ku myaka 50 nta mugore cyangwa umwana afite ko akiri ingaragu. Uyu wabaye umukinnyi rurangiranwa muri Rayon sports (yamazemo imyaka icumi) aracyaba mu nzu imwe na nyina.

Sembagare Jean Chrysostome, benshi bakunze kwita Semba wa Semba, ni Umunyarwanda wavukiye mu yahoze ari Perefegitura ya Ruhengeri ku itariki 30 Kamena 1966.

Mu kiganiro cyihariye yagiranye na IGIHE yagaragaje ko nta pfunwe atewe no kubaho mu buzima bw’ingaragu.

IGIHE: watangiye gukina umupira w’amaguru ryari?

Sembagare: Njye natangiriye mu cyiciro cya Kabiri mu ikipe yitwaga NAHV, yari ikipe y’ikigo cy’amamodoka y’ubwoko bwa Peugeot mu 1982 – 1984.

IGIHE : Naho mu cyiciro cya mbere?

Sembagare: Natangiye gukina umupira w’amaguru mu cyiciro cya mbere mu 1984 muri Rayon sports ndetse ni nayo kipe yonyine yo mu cyiciro cya mbere nakiniye mu Rwanda.

IGIHE: Ni uwuhe mukino wakinnye wagushimishije mu buzima bwawe?

Sembagare: Umukino wahuje Rayon Sport na Kiyovu Sports i Bujumbura tugatsinda igitego 1 – 0.

IGIHE: Ko wari umukinnyi ukomeye ni iki cyatumye udakinira ikipe y’igihugu Amavubi?

Sembagare : Sinigeze nyikinira n’umukino n’umwe kubera ko barampamagaraga ariko simbone umwanya kubera amasomo, uretse ko nyine nigeze kujya mu mwiherero wayo ariko birangira tudakinnye.

IGIHE: Ese umaze igihe kingana gute uhagaritse gukina umupira w’amaguru?

Sembagare: Maze imyaka igera 22 mpagaritse gukina umupira w’amaguru kuko nawuhagaritse mu 1994.

IGIHE: Kuki wahagaritse gukina?

Sembagare: Byatewe n’ibibazo bya Jenoside yakorewe abatutsi mu 1994.

IGIHE: Watangiye gukina uhembwa amafaranga angahe?

Sembagare: Urebye ahanini sinakinaga mpembwa amafaranga mu ntoki kuko nk’ikipe ya NAHV nakiniye mu cyiciro cya Kabiri yanyishyuriraga amafaranga y’ishuri ubwo nari mu yisumbuye.

IGIHE: Muri Rayon sports se ho wahembwaga angahe?

Sembagare: Rayon sport nayo ntabwo yampembaga ahubwo yandihiraga amafaranga y’ishuri muri Kaminuza y’u Rwanda i Butare agera ku bihumbi 10. Iyo nayakoreshaga yose nakuyemo n’amafaranga ya resitora nasigaranaga nk’ibihumbi 3600 gusa, yabaga ari menshi ugereranyije no muri iki gihe.

IGIHE: Ese muri iki gihe ubayeho ute ugereranije na mbere ugikina umupira w’amaguru muri Rayon sports?

Sembagare: Urebye sinzi uko nabigereranya bitewe n’uko n’imyaka ndetse n’agaciro k’amafaranga y’ubu n’aya kera gatandukanye. None se ko kera wasangaga dukinira ubuntu abo dukiniye bakaturihira amafaranga y’ishuri gusa, ubu hari ubwo bikibaho?

IGIHE: Ese nta kandi kazi gafitanye isano n’umupira w’amaguru ukora?

Sembagare: Urebye ntako uretse kuba ntoza abahoze ari abakinnyi mu bihe bya mbere mu kipe yitwa Imikeke yo ku Mumena i Nyamirambo nkaba no mu bajyanama ba Rayon sports.

IGIHE: Ugira umukunzi?

Sembagare: Ibyo ni ibanga ryanjye

IGIHE : Uteganya gushaka ryari?

Sembagare : Ariko ibyo nakubwiye ko ari ibanga ryanjye, kandi ikindi ibyo n’ibintu biba bizwi n’Imana cyane cyane ko buri wese aba afite igeno yamugeneye.

IGIHE : Ese ko kugira imyaka 50 umuntu atarashaka bidakunze kubaho mwe mwabitewe n’iki?

Sembagare: Icyo nakubwira kuri ibyo n’uko ibyo byose ari Imana ibigena cyane cyane ko buri muntu wese aba afite ibibazo bye n’ubuzima butandukanye n’ubwo abandi banyuzemo.

IGIHE: Nta pfunwe bigutera?

Sembagare: Ntaryo bintera kuko buri muntu wese aba afite ubuzima n’ibibazo bye yanyuzemo bitandukanye n’iby’abandi cyane cyane ko nta n’uhura n’imbogamizi zimeze nk’iz’undi.

IGIHE: Usengera mu rihe dini?

Sembagare: Jye ndi Umudivantiste w’Umunsi wa karindwi.

Sembagare yakiniye Rayon Sports kuva mu 1984 kugeza 1994. Mu 1995 yerekeje mu mujyi wa Bukavu muri Repubulika Iharanira Demokarasi ya Congo akinira Mayi Moto, ahava yerekeza mu Burundi muri Inter Stars.

Sembagare ni umwe mu bakinnyi bakanyujijeho mu myaka yo hambere

Sembagare yamaze imyaka icumi muri Rayon Sports

Sembagare wamamaye muri Rayon Sports asigaye atoza ikipe y’abasaza, Imikeke FC ikinira ku Mumena


SRC: IGIHE

Abakobwa 20 bafite ikibuno gikurura abagabo kurusha abandi muri Afurika (Amafoto)
Ibuka yanyuzwe n’ibihano byahawe Nyiramasuhuko na bagenzi be
Ibisubizo bya Apôtre Gitwaza ku busambanyi,ubuhemu no gukorana na satani avugwaho
Umusirikare yambitswe ikamba rya Nyampinga wa USA

Tanga igitekerezo

Kwamamaza

Developed by Amitabha Technology, Inc.