DOVE MAGAZINE

Polisi yafashe imodoka irimo abagore babiri binjizaga mu gihugu inzoga zitemewe

Share Button

Inspector of Police (IP) Emmanuel Kayigi, umuvugizi wa Polisi mu ntara y’Uburasirazuba.

Polisi y’u Rwanda ikorera mu karere ka Musanze na Gatsibo, kuwa kabiri tariki ya 14 Gashyantare yafashe abantu 6 barimo 2 bafatiwe muri Musanze binjizaga inzoga zitemewe mu Rwanda, n’abandi 4 bafatiwe muri Gatsibo bafite udupfunyika tw’urumogi.

Abafatiwe muri Musanze ni Niyonsenga Claudine w’imyaka 23 wafatanywe amapaki 192 y’inzoga itemewe gucuruzwa mu Rwanda ya Blue Sky, na Ingabire Carine w’imyaka 30, we akaba yari afite amaduzeni 3 ya Blue Sky.

Umuvugizi wa Polisi mu ntara y’Amajyaruguru Inspector of Police (IP) Innocent Gasasira, yavuze ko aba bagore bari hamwe n’abandi bagenzi mu modoka yavaga mu karere ka Musanze yerekeza mu ka Rubavu.

Yavuze ati:”Polisi y’u Rwanda ikorera mu karere ka Musanze yari ifite amakuru ko aba bagore binjije izi nzoga zitemewe mu Rwanda muri iyi modoka berekeje muri Rubavu, nibwo bashyizeho bariyeri ihageze barayisaka bazisangamo, niko guhita bafatwa, ubu bakaba bafungiye kuri sitasiyo ya Polisi ya Busogo.”

IP Gasasira yakomeje avuga ati:”Bimaze kugaragara ko abagore aribo benshi basigaye bishora mu bucuruzi bw’izi nzoga zitemewe.Turabasaba kubuvamo kuko ubucuruzi butemewe ubwo aribwo bwose iyo ufashwe urahomba kandi ugacibwa n’amande.”

Yasabye abantu bose gukora ubucuruzi bwemewe n’amategeko kuko ubukora nta ngaruka ahura nazo.

Mu karere ka Gatsibo ho hafatiwe abitwa Nkubana Tharcisse w’imyaka 41, Ngabonziza Pacifique w’imyaka 23, Sibomana Athanase w’imyaka 27 na Dukuze Gilbert w’imyaka 22, bakaba bafatanywe udupfunyika 304 tw’urumogi, ubu bakaba bafungiye kuri sitasiyo ya Polisi ya Kiramuruzi.

Umuvugizi wa Polisi mu ntara y’Uburasirazuba Inspector of Police (IP) Emmanuel Kayigi, yavuze ko abaturage babahaye amakuru ko hari umwe mu baturage utuye mu kagari ka Rubona Umurenge wa Kiramuruzi ucuruza urumogi, kandi ko hari abantu bagiye kurugurayo, nibwo Polisi yagiyeyo ihasanga aba uko ari 4, bahasanga na turiya dupfunyika twarwo.

IP Kayigi yasabye abantu kwirinda kunywa no gucuruza urumogi avuga ati:”Abakishora muri ibi bikorwa bamenye ko iminsi y’umujura ari 40. Bamenye ko abaturage aribo baduha amakuru y’ababikora, kandi ko abaturage bamenye ububi bw’ibiyobyabwenge kuko uwo bakeka ko atabatanga ariwe ubatanga bagafatwa.”

Yasabye abaturage gukora akazi kemewe aho kwangiza ubuzima bw’abantu bataretse n’ubwabo. Aha yavuze ati:”Iyo ucuruza cyangwa ukanywa ibiyobyabwenge uhomba kabiri; Urafungwa ikindi abantu bagufata nk’aho nta kamaro ufitiye umuryango nyarwanda.”

Yashimiye abaturage batanze amakuru ngo aba bagizi ba nabi bafatwe, asaba n’abandi kwihutira gutanga amakuru y’icyahungabanya umutekano kuko nta ngaruka zibamo.

Ingingo ya 594 yo mu gitabo cy’amategeko ahana ibyaha mu Rwanda ivuga ko umuntu ukoresha ibiyobyabwenge n’urusobe rw’imiti ikoreshwa nka byo bitemewe n’amategeko ahanishwa igifungo kiri hagati y’imyaka 3 kugera kuri 5 n’ihazabu y’amafaranga ibihumbi magana atanu (500,000Frw) kugera kuri miliyoni eshanu (5,000,000Frw) z’amafaranga y’u Rwanda.

Iby’Umuyobozi muri FDLR wafatiwe Uganda ntibirasobanuka ngo u Rwanda rumusabe
Corneille wabyaye umukobwa agiye gusohora igitabo gikubiyemo ubuzima bwe
Abaturage babona imihigo ibitura hejuru - Ubushakashatsi
Nyarugenge: Yafatanywe Impushya ebyiri zo gutwara ibinyabiziga z’inyiganano

Tanga igitekerezo

Kwamamaza

Developed by Amitabha Technology, Inc.