DOVE MAGAZINE

Okoko ntaremera ko Umunyamabanga na Perezida ba Mukura VS beguye

Umutoza w’ikipe ya Mukura VS, Okoko Godefroid, avuga ko atariyumvisha uburyo abayobozi bakoranye neza umwaka ushize ikipe ikagera ku ntego yari yihaye ndetse bagatuma yongera amasezerano bamutaye ku rugamba bari biyemeje kuzafatanya rwo kuyihesha igikombe kimwe mu bikinirwa mu gihugu.

Abayobozi bakuru ba Mukura VS barimo Perezida Nizeyimana Olivier ndetse n’umunyamabanga mukuru w’iyi kipe Sheikh Habimana Hamdan batangaje ko beguye ku buyobozi bw’iyi kipe ku wa Kabiri tariki 27 Nzeri mu buryo bwatunguranye haba ku bakunzi ba Mukura VS ndetse n’abakunda umupira w’amaguru muri rusange bitewe n’ubwitange aba bagabo bagaragazaga mu buzima bwa buri munsi bw’iyi kipe.

Nyuma y’iminsi itatu abo bayobozi beguye, umutoza Okoko Godefroid ngo aracyabyumva nk’inzozi ko abantu bari inkingi za mwamba mu ikipe, bakoraga batayishakamo amaramuko ahubwo bagaragazaga ko ibaba ku mutima ndetse abakinnyi babafata nk’ababyeyi na bakuru babo bayisigira icya rimwe kandi ari bwo yari ibakeneye kurushaho.

Aganira na IGIHE yagize ati “Hoya, hoya, ntaho bagiye rwose. Nta bwoba dufite muri Mukura, bariya bashefu (chefs) bazagaruka, ni ababyeyi b’abakinnyi ntibabasiga. Nta kizahinduka na kimwe. Yaba abatoza n’abakinnyi dufite icyizere ko bazagaruka.”

Nubwo Okoko agifite icyizere ko aba bayobozi bashobora kwisubiraho bakagaruka, kuri uyu wa Kane, Sheikh Hamdan Habimana wari umunyamabanga w’iyi kipe, yabwiye IGIHE ko yamaze kugenda ku mpamvu ze kandi ko nta gahunda afite yo kugaruka ku buyobozi ariko akazakomeza kuba hafi y’abakinnyi ndetse no gutanga umusanzu we nk’uko yabikoraga na mbere.

Kutagaruka kwa Sheikh Hamdan bivuze ko na Perezida Nizeyimana amahirwe ye yo kugaruka ku mirimo ye ari make bitewe n’uko ko yeguye abitewe n’ubusabe bw’abakinnyi bari bamwandikiye bamusaba ko yakora ibishoboka byose akagarura umunyamabanga, abonye ko ibi atabishobora ahitamo kugenda na we.

Haba mu bakunzi ba Mukura VS, abakunzi ba ruhago ndetse n’Akarere ka Huye gasanzwe gatera inkunga iyi kipe, nta n’umwe utemera ko ari igihombo gikomeye iyi kipe yarangije ku myanya wa gatatu muri shampiyona umwaka ushize yagize kuko uretse kuba bari abayobozi beza, bumvikana n’abakinnyi n’abatoza ndetse banakundwa n’abafana, aba bagabo ngo batangaga n’akayabo mu ngengo y’imari y’iyi kipe.

Uyu mwaka mu ngengo y’imari ingana na miliyoni 157 ikipe izakoresha, Sheikh Hamdan wari watowe nk’umunyamabanga mukuru muri Nyakanga 2015, azatangamo miliyoni 15 mu gihe Nizeyimana Olivier wari Perezida w’iyi kipe kuva mu 2011, azatanga miliyoni 25 mu ngengo y’imari akanatanga imodoka itwara abakinnyi mu mikino yose baba bitabiriye.

Umutoza Okoko ngo ntaremera ko Abayobozi bakuru ba Mukura VS baherutse kwegura batazagarukaUmutoza Okoko ngo ntaremera ko Abayobozi bakuru ba Mukura VS baherutse kwegura batazagaruka


SRC: IGIHE

Cindy agiye gukorera igitaramo i Kigali
Brazil: Inzira yo kweguza Perezida Roussed irakomeje
Abanyarwanda batatu biciwe muri Uganda
Inzira y’umusaraba Apôtre Gitwaza yanyuze kugeza ubwo ashatse kuzura umwana we

Tanga igitekerezo

Kwamamaza

Developed by Amitabha Technology, Inc.