DOVE MAGAZINE
The Next Star Rwanda

Ngororero: Polisi yaganirije abanyeshuri ba College Amizero na ESECOR ku icuruzwa ry’abantu

Share Button

IP Jean Marie Vianney Tuyisabe na AIP Ariane Muhorakeye n’abanyeshuri baganirije ku icuruzwa ry’abantu.

Umuyobozi wa Sitasiyo ya Polisi ya Kavumu, Inspector of Police (IP) Jean Marie Vianney Tuyisabe n’ushinzwe imikoranire ya Polisi n’abaturage ndetse n’izindi nzego mu karere ka Ngororero, Assistant Inspector of Police (AIP) Ariane Muhorakeye, ku wa 17 Kamena uyu mwaka baganirije abanyeshuri bagera kuri 470 biga muri College Amizero na ESECOR ku icuruzwa ry’abantu n’uburyo bakwirinda kugwa mu mutego w’abakora iki cyaha.

IP Tuyisabe yabanje gusobanurira urwo rubyiruko icyo icuruzwa ry’abantu ari cyo; aha akaba yarababwiye ko ari ibikorwa bihindura umuntu igicuruzwa bijyanye no gushakisha cyangwa kwimurira umuntu ahandi mu gihugu cyangwa mu mahanga hakoreshejwe uburiganya, ibikangisho, imbaraga cyangwa agahato, ububasha ubikora aba amufiteho, akenshi hagamijwe kumwangiriza ubuzima cyangwa kumubyaza inyungu zitemewe akoreshwa mu biterasoni, mu buraya, mu bikorwa binyuranyije n’amategeko, mu bisa n’ubucakara, kumwica urubozo no kumukorera urugomo ndengakamere cyangwa kumukoresha imirimo yo mu rugo nk’umuja, hishingikirijwe intege nke umuntu afite zikomoka ku bibazo afitanye n’ubuyobozi, ku gutwita k’umugore wibana, indwara, ubumuga n’ibindi bibazo byatuma umuntu muzima akora icyo atatekereje, nk’uko biteganywa n’ingingo ya 250 y’Itegeko Ngenga N° 01/2012/OL ryo ku wa 02/05/2012 rishyiraho Igitabo cy’Amategeko ahana ibyaha mu Rwanda.

Yababwiye ko iyi ngingo (250) ikomeza ivuga ko bifatwa kandi nko gucuruza abantu, kubashakamo inyungu hakoreshejwe kubagira abasabirizi ku gahato, kubabera ababyeyi batababyaye hakoreshejwe ikiguzi mu buryo butemewe n’amategeko, kubakoresha mu mashusho y’urukuzasoni, mu masiporo abangamiye ubuzima, kubashora mu ntambara, kubana na bo nk’umugore n’umugabo hagamijwe iyicarubozo n’icuruzwa ry’ingingo z’imibiri yabo.

Yongeyeho ko abakora ubu bucuruzi bizeza abo babushoramo ko bazagirira imibereho myiza aho bashaka kubajyana; ariko ko iyo babagejejeyo babambura ibyangombwa byose, hanyuma bakabakoresha imirimo ivunanye kandi nta gihembo, ubundi bakabashora mu bikorwa by’urukozasoni nk’ubusambanyi.

Mu kiganiro yagiranye n’abo banyeshuri, AIP Muhorakeye yababwiye ati,” Abakora icyaha cy’icuruzwa ry’abantu bakora ibishoboka byose kugira ngo hatagira umenya ibikorwa byabo usibye uwo bashaka kujya gucuruza. Umuntu nk’uwo ushaka kubajyana aho mutazi abatesheje ishuri nta cyiza aba abifuriza. Nihagira ubizeza ibyo bitangaza ntimukabyihererane; ahubwo muzabimenyeshe ababyeyi banyu, ababarera, cyangwa inzego z’umutekano kugira ngo niba ari ushaka kujya kubacuruza afatwe.”

Yabasabye kandi kwirinda kwishora mu biyobyabwenge by’ubwoko bwose kuko bishobora kubatera uburwayi butandukanye , gukora ibyaha birimo gukubita no gukomeretsa ; kandi ko byabatera kwishora mu busambanyi bukurikirwa n’ingaruka zirimo kwandura zimwe mu ndwara zandurira mu mibonano mpuzabitsina no gutwara inda zitateganyijwe.

AIP Muhorakeye yagize kandi ati, “Ni gute umuntu mutaziranye, ndetse mudafitanye isano akwizeza ibitangaza by’ubuzima bwiza ukemera ko ibyo akubwira ari ukuri. Ugomba kwibaza kuri izo mpuhwe akugiriye atakuzi. Nihagira ubibizeza muzamwamaganire kure, kandi mutangire ayo makuru ku gihe.”

Mu ijambo rye, ushinzwe urubyiruko n’Umuco mu karere ka Ngororero, Namahoro Seraphin yashimye Polisi ku gikorwa cyo kuganiriza abo banyeshuri ku buryo bakwirinda kugwa mu mutego w’abacuruza abantu; hanyuma abasaba gukurikiza inama bagiriwe.

U Busuwisi: Abanyarwanda mu busabane n’abaturuka mu bindi bihugu bya EAC
Inka yabyaye igisimba gisa nk’ingona
Dr. Kizza Besigye yongeye gutabwa muri yombi
Uganda: Ingufu z'Umutwe wa LRA zaragabanutse cyane

Tanga igitekerezo

Kwamamaza

Developed by Amitabha Technology, Inc.