DOVE MAGAZINE

Minisitiri Mukeshimana yasabye Abanyarwanda guhaza igihugu mu biribwa

Minisitiri w’Ubuhinzi n’Ubworozi Dr Geraldine Mukeshimana, yasabye abahinzi gukora uko bashoboye kose bakabona umusaruro w’ubuhinzi uhagije hatitawe ku mihindagurikire y’ikirere, kuko u Rwanda ari igihugu gifite intego yo kwihaza mu biribwa, hadategerejwe ibiva mu mahanga.

Ubu butumwa Minisitiri Dr Mukeshimana yabutangiye mu murenge wa Remera mu karere ka Gatsibo, aho yari yitabiriye umuganda wo kuhira imyaka yahuye n’ikibazo cy’izuba.

Uyu muyobozi yibukije ko abahinzi bakwiye guhindura imyumvire yo guhinga bikanga ko ikirere cyahinduka, ahubwo bagateganya icyakorwa mu gihe ikirere kibatengushye, igihe bateganyagamo imvura kikaba icy’izuba.

Yagize ati “Nashakaga kubakangurira ko tuva mu gutekereza ko tuzabeshwaho n’ibihe, kuko byarahindutse. Duhindure imyumvire dukoreshe ubufasha bwose Leta iduha kugira ngo twuhire imyaka.

 

????????????????????????????????????

Minisitiri Dr Mukeshimana (wa kabiri ) ari kumwe na Meya w’Akarere ka Gatsibo mu muganda wo kuhira imyaka( Foto Hakizimana Y)

U Rwanda ntabwo ruzigera rwongera kugaburirwa, ibyo byo byavuyeho, ni yo mpamvu abayobozi bose baba bamanutse kugira ngo babatere ingabo mu bitugu mukorane umurava.”

Minisitiri Mukeshimana kandi yibukije abo baturage ko mu rwego rwo guhangana n’ikibazo cy’ibihe bihindagurika bakwiye guhinga igihembwe cya gatatu batari basanzwe bamenyereye, mu mpeshyi bagahinga nk’imboga n’ibindi, cyane cyane abari ahantu hegereye amazi.

Umuganda wakozwe wari uwo kuhira kimwe mu bice biri mu gishanga cya Kanyonyomba ya 2, mu kagari ka Rurenge mu murenge wa Remera, ahantu bahinze soya ku buso bwa hegitri 530.

Ibibazo byagarutsweho n’abaturage bakorera ubuhinzi muri icyo gishanga ahanini ni ibijyanye n’uko babona imashini zibafasha kuhira, ariko zikoresha imirasire y’izuba.

Uwitwa Cyubahiro Charles, yagize ati:“Ubu buryo bwo kuhira abantu bakoresha lisansi ni ibintu bigoye cyane, ubu ntitwizeye inyungu mu gihe tugikoresha imashini za lisansi.Twasabaga yuko mwadufasha tukabona izikoresha imirasire y’izuba, ubu buryo tububonye ntitwakongera kugorwa n’igihe cy’ihinga nk’uko byatugendekeye.”

Minisitiri w’ubuhinzi n’ubworozi yabwiye aba baturage ko bakwiye gukora umushinga wabo neza bakawusobanura, byagaragara ko hakenewe imashini zikoresha imirasire y’izuba nazo zigatangwa.


SRC:IMVAHO NSHYA

Ikamyo ya Bralirwa yari ivanye inzoga i Kigali igiye Huye yakoreye impanuka mu Ruhango
U Burayi bwateye u Rwanda inkunga ya miliyari 6.3 frw yo gucunga ubutaka
Nubwo mpembwa macye, ndi Umukire mu buhinzi- Museveni
USA: Perezida Kagame yashimangiye ko Afurika itatera imbere itabonye ingufu zihagije

Tanga igitekerezo

Kwamamaza

Developed by Amitabha Technology, Inc.