DOVE MAGAZINE

ABARANGIJE AMASHULI YISUMBUYE 2014 BATANGIRA KWIYANDIKISHA MURI UNIVERSITY OF RWANDA

Share Button

Kaminuza y’u Rwanda (UR) yatangaje ko guhera kuri uyu wa 6 werurwe 2015 abarangije amashuri yisumbuye bashaka kuyigamo mu mwaka w’amashuri utaha(2015/2016) gutangira kubisaba.

Ubuyobozi bwa UR bwabwiye itangazamakuru ko ifite myanya ingana n’iy’umwaka ushize, irenga ibihumbi 12 muri koleji zayo esheshatu zifite ibyicaro bigera kuri 12.

Umuyobozi Wungirije wa Kaminuza, Prof James Mc Wha, yavuze ko amarembo akinguriye buri wese ufite ubushobozi kwiyandikisha, agaragaza ko nta cyiciro runaka cyahabwa amahirwe kuruta ikindi, yaba n’igitsina gore.

Yagize ati“Turakira bose tutitaye kuba yaba ari abahungu cyangwa abakobwa, aturuka mu cyaro se cyangwa i Kigali, umukene cyangwa umukire.”

 

Yagaragaje ko nka Kaminuza ubwayo nta gahunda ihari yo kuba hari buruse zahabwa abakinnyi, kereka hagize abaterankunga bazitanga.

Prof Mc Wha yavuze ko yakwishimira kubona abakobwa n’abahungu basaba kwiga muri UR bangana ku ijanisha.

UR yagaragaje ko ifunguye gusaba hakiri kare mu gukumira ibibazo byavutse mu mwaka ushize, bamwe bagacikanwa cyangwa bakuzuza amakuru aberekeyeho nabi.

UR izahagarika kwakira abasaba kuyigamo kuwa 4 Gicurasi 2015, habeho ijonjora, abemerewe bashyirwe ahagaragara muri Kanama.

 

Prof James Mc Wha ari kumwe n’abandi bayobozi muri Kaminuza y’u Rwanda

UR yatangaje ko kwandika abanyeshuri kare bizanafasha abanyeshuri gushaka uko bazishyura, yaba n’abaka inguzanyo ya Leta.

Umuyobozi Wungirije ushinzwe amasomo, Prof. Nelson Ijumba, yavuze ko amanota asabwa kugira ngo umuntu yemererwe kwiga muri UR, ari ukuba umunyeshuri yaratsinze amasoma abiri y’ibanze ajyanye n’ishami agiye kwiga. Mu bize iby’ubumenyamuntu akaba afitemo byibuze amanota 18, naho uwize amasomo y’ubumenyi akaba afitemo byibura 24.

Uko kwiyandikisha bikorwa

Ushaka kwiga muri iyi kaminuza y’Igihugu ashobora kubisabira aho ari hose ku isi, kuko bikorerwa kuri internet, ku rubuga rwa UR.

Umunyeshuri ajya ku rubuga rwa UR, akuzuza amakuru amwerekeyeho, agahitamo amashami atanu yakwigamo, agahabwa nimero ajya yishyuraho amafaranga y’u Rwanda ibihumbi bitanu muri I&M Bank cyangwa muri Bank of Kigali(BK). Utaramara kwishyura ntaba aba yari yarangiza intambwe zisaba mu gusaba.

 

Utabashije kubikorera kuri internet, ashobora kujya ku cyicaro cy’ishami rya UR rimwegereye, agafashwa gusaba.

Abatarigiye mu Rwanda bo ntibemerewe kwiyandikisha kuri internet, basabwa gusaba buzuza impapuro zabugenewe nabo bakura ku rubuga (download) rwa UR. Ibi bikanareba abarangije amashuri yisumbuye mbere y’umwaka wa 2001.

Umwaka ushize UR yemereye abanyeshuri ibihumbi 12, ariko hajya kwiga ibihumbi bitandatu, bamwe bitewe no kubura inguzanyo ya leta.

AMAFOTO: NKINZIBNGABO JACQUES
SRC/IGIHE

JOB OPPORTUNITY AT GISENYI RUBAVU
Abanyarwanda 10 boherejwe kuminuriza mu Buyapani bahawe impanuro
Kaberuka na Lopes mu ntiti ziri gufasha Perezida Kagame kuvugurura Komisiyo ya AU
Mu Kwezi Kumwe Gusa, Abasaga 250 bamaze guhitanwa na Korela

Tanga igitekerezo

Kwamamaza

Developed by Amitabha Technology, Inc.