DOVE MAGAZINE

Iyi ntsinzi ni intangiriro nziza – McKinstry

Umutoza w’ikipe  y’ igihugu  Amavubi, Jonathan McKinstry,  yatangaje ko  intsinzi  y’igitego 1-0 imbere ya Mozambique  igiye  kuba  intangiriro  nziza  mu   rugendo  ruzageza Amavubi  mu gikombe cy’Afurika kizabera muri  Gabon muri  2017, asaba  abasore b’Amavubi  kwerekeza amaso  ku  mukino  wa Ghana  wo muri Nzeli 2015.

Coach McKinstry in final training session before game - 13 June 2015  [Training camp ahead of Rwanda Amavubi v Mozambique on 14 June 2015 (Pic © Darren McKinstry / www.johnnymckinstry.com)]

Coach McKinstry in final training session before game – 13 June 2015 [Training camp ahead of Rwanda Amavubi v Mozambique on 14 June 2015 (Pic © Darren McKinstry / www.johnnymckinstry.com)]

 Ibi  yabivuze  nyuma  y’umukino  wahuje Amavubi  na Os Mambas  ikipe  y’igihugu ya Mozambique, taliki  ya 14  Kamena 2015  kuri Sitade Zimpeto  i Maputo. Amavubi  yatsindiwe na  Sugira  Ernest  ku munota wa 3  ku  mupira wari  utewe na Tuyisenge Jacques, usanga  Sugira wawuboneje mu rushundura n’umutwe.  Nyuma yo kubona iki igitego, ba myugariro b’ikipe y’igihugu bagizwe na Rusheshangoga Michel, Bayisenge Emery, Usengimana Faustin na Sibomana Abouba baje kubyitwaramo neza bazibira uburyo butandukanye bwa Elias Pelembe Domingues, Josemar Machaisse Josemar na Clesio Bauque Clesio.

Iki gitego cyakuyeho agahigo  kabi  Amavubi  yari  afite  ko  kumara imyaka 4 adatsindira hanze y’u Rwanda kuko  umukino wa nyuma yaherukaga gutsinda ari  uwo  yatsindiye  Benin  mu rugo igitego 1-0 taliki ya 09 Ukwakira 2011 mu gushaka  itike ya CAN 2012. Nyuma  y’umukino, Jonathan McKinstry yatangaje  ko intego ze ari  ukwirinda  gutsindwa  igitego  cyo hanze, bityo ari  intangiriro  nziza kuba  babigezeho  akanabona amanota 3. Ati” Gutsindira hanze  si ibintu  biba byoroshye  muri Afurika,  intego yacu  ni ukwirinda kwinjizwa igitego. Twishimiye  amanota 3  twabonye   iyi ni intangiriro. Ni akazi  gakomeye  k’abakinnyi. Umusaruro  w’ u Rwanda  iyo rwakiniye  hanze, ntiwabaye  mwiza  nk’uko amateka abivuga; ntabwo twavuga ko  buri gihe tuzajya dutsindira hanze, ariko  tuzagerageza  kwirinda kwinjizwa ibitego  ku buryo  twajya tubona inota hanze,  tugacungana no kubona intsinzi  mu rugo”.

McKinstry  ugomba guhura na Ghana muri Nzeli  2015 agaragaza  ko  bagiye  gukora ibishoboka  bagategura  uyu  mukino.  Ati «Umutima wacu  tuwerekeje kuri  Ghana tuzakina muri Nzeli 2015 i Kigali, turasabwa rero  imyiteguro ihambaye mbere yo  guhura n’iyi kipe. Minisiteri ya Siporo na FERWAFA barifuza  kudufasha  badushakira  imikino  myinshi ya gicuti  n’umwiherero  bizadufasha kwitegura uwo  mukino  na CHAN 2016 ». 

Usibye Amavubi  yatsinze Mozambique mu itsinda rya H, Ghana yanyagiye ibirwa bya Maurice   ibitego 7-1 bya Jordan Ayew watsinze bibiri, Asamoah Gyan bibiri, Christian Atsu, Jeffrey Schlupp na David Accam mu gihe igitego rukumbi cya Ile Maurice cyatsinzwe na Sophie. Amavubi yageze mu Rwanda mu rukerera rw’uyu wa kabiri taliki 16 Kamena 2015.

by BIZIMANA ERIC


IMVAHO NSHYA

Gen. David Sejusa yatawe muri yombi
U Rwanda rwarekuye abasirikare babiri ba RDC
U Bufaransa bwiyemeje kurandura burundu umutwe wa IS
Burundi: Bane barimo n’umwana bahitanywe na gerenade

Tanga igitekerezo

Kwamamaza

Developed by Amitabha Technology, Inc.