DOVE MAGAZINE

Ingabire Habiba yemejwe mu bazitabira Miss Supranational, bamwe bahise bamwibasira

Share Button

Nyuma ya Akiwacu Colombe wahagarariye u Rwanda mu mwaka wa 2016, Ingabire Habiba ni we uzahatanira iri kamba mu marushanwa Mpuzamahanga ya Miss Supranational umwaka wa 2017.

Ubuyobozi butegura Miss Supranational bwemeje Ingabire Habiba w’imyaka 20 y’amavuko ko ari we uzahagararira u Rwanda muri aya marushanwa azabera muri Pologne.

Ingabire Habiba yari yatowe na Uwamahoro Yvonne wahagarariye u Rwanda bwa mbere muri Miss Supranational, uyu ni na we uhitamo umukobwa uzaserukira igihugu hanyuma akemezwa n’abategura iri rushanwa.

Ku rubuga rwa Miss Supranational ndetse no ku mbuga nkoranyambaga z’iri rushanwa, abaritegura bongereye Habiba ku rutonde rw’abakobwa bemerewe kuzahatana uyu mwaka. Ku nshuro ya munani irushanwa rigiye kuba rizitabirwa n’abakobwa 80 bo mu bihugu bitandukanye.

Ingabire Habiba amaze kwakira ibaruwa imwemerera mu buryo busesuye ko azaserukira u Rwanda yahise yandika kuri Instagram ko ashimishijwe by’ikirenga n’itike yahawe.

Mu gusoza ubutumwa bwe, ikaramu ya Habiba ishobora kuba yanyereye yandika ati ‘mfite amashyushyu yo kuzajya muri Porand[aho kwandika Poland]’. Ibi byatumye bamwe bamuha urw’amenyo ku mbuga nkoranyambaga ndetse hari n’abatangiye gushidikanya ku bumenyi afite.

Yaherukaga kuvugwa kubera ibitutsi yatutse umukemurampaka

Ingabire Habiba nta kamba rya Nyampinga yigeze yambikwa mu byiciro bizwi gusa mu irushanwa rya Miss Rwanda 2017 yari mu bakobwa 16 biyamamarije guhagararira Umujyi wa Kigali ntiyabona amahirwe.

Ku itariki 28 Mutarama 2017 Ingabire Habiba yahatanye na bagenzi be bari mu marushanwa yo gushaka itike yo kwinjira muri batanu bagombaga guhagararira Umujyi wa Kigali muri Miss Rwanda ku rwego rw’igihugu.

Nyuma Habiba yaje kubura amahirwe yo gukomeza bamukuriramo mu majonjora ibintu byaje kumutera kwibasira Rwabigwi Gilbert wari mu kanama nkemurampaka akaba yari yamuhaye ‘No’ maze aramutuka aramwandagaza.

Ibitutsi Habibah yatutse Rwabigwi yabinyujije ku rukuta rwa Instagram aho yamushinjaga kumubuza amahirwe yo gukomeza amarushanwa ubwo yamuhaga ‘No’ mu gihe bagenzi be [Mariya Yohani na Mike Karangwa] bari bamuhaye ‘Yes’ kandi byagaragaraga ko yari afite ubwiza bwakagombye guhita bumutambutsa.

Habiba amaze gucururuka no kwisuzuma akabona ko yarengereye, yaciye bugufi asaba imbabazi Rwabigwi impagarara yari yateje ziherera aho. Ubu agiye gutangira urugendo rushya nka Nyampinga uzaserukira igihugu muri Miss Supranational aho agomba kuzakora ibishoboka agatahana ikamba.

Umuhindekazi witwa Srinidhi Shetty ni we wegukanye Miss Supranational 2016 mu birori byabaye kuwa 2 Ukuboza 2016 kuri Spa Resort mu Mujyi wa Krynica- Zdroj.

SRC: IGIHE

Kanye West yahawe impamyabumenyi y’ikirenga y’icyubahiro
Mbabazi Lilian ntagitora agatotsi nyuma yo gutandukana na Radio
Gahongayire yasanze abagiye muri Amerika barataye agakiza
Umuhanzi Harmonize ari mu Rukundo n'Umuzungukazi

Tanga igitekerezo

Kwamamaza

Developed by Amitabha Technology, Inc.