DOVE MAGAZINE

Igisirikare cya Amerika kirashinjwa ibyaha by’intambara n’iyicarubozo

Umushinjacyaha Mukuru w’Urukiko Mpuzamahanga Mpanabyaha rw’i La Haye mu Buholande, Fatou Bensouda, ejo ku wa Mbere yashyize hanze icyegeranyo gishinja igisirikare cya Leta Zunze Ubumwe za Amerika n’inzego z’iperereza zayo gukorera iyicarubozo imfungwa mu myaka ya 2003 na 2004.

Iyo raporo igaragaza ko igisirikare cya Amerika cyakoze ibyaha by’intambara muri gereza zo muri Afghanistan no mu bindi bihugu byinshi muri iyo myaka.

BBC yanditse iyi nkuru ivuga ko Fatou Bensouda yatangaje ko urukiko rufite ibimenyetso simusiga bigaragaza uburyo igisirikare n’urwego rw’iperereza rwa Amerika, CIA, bakoraga ibikorwa bibyara ibyaha by’intambara.

Bensouda akomeza avuga ko nibura abasirikare 61 bari muri Afghanistan bakoreye imfungwa ibikorwa bifatwa nk’ibyaha by’intambara n’iyicarubozo.

Icyo cyegeranyo kigaragaza ko CIA ubwayo yatoteje imfungwa zirenga 20 mu bihugu bya Afghanistan n’ibindi byo mu burasirazuba bw’umugabane w’u Burayi.

Bensouda avuga ko hari impamvu zifatika zemeza ko ibyo byaha byakozwe hashyirwa mu bikorwa politiki igamije iperereza ariko hifashishijwe inzira mbi, cyane cyane bigakorwa mu nyungu zo kurwanya iterabwoba.

Abasesengura imikorere ya ICC bavuga ko Umushinjacyaha mukuru agomba gufata umwanzuro ku buryo bwihuse, akareba niba ashobora no gufungurira urubanza inzego za Leta ya Afghanistan n’abarwanyi b’umutwe w’Abatalibani.

Leta Zunze Ubumwe za Amerika ntizasinye amasezerano ya Rome ashyiraho urukiko Mpuzamahanga Mpanabyaha, ibi bigatuma abasesenguzi bavuga ko bigoye ko izo ngabo zayo zari mu butumwa bw’amahoro hanze y’igihugu zishobora kuzakurikiranwa.

Uru rukiko rwashinzwe ku itariki ya mbere Nyakanga mu mwaka wa 2002, hagamijwe gukurikirana abakora ibyaha by’intambara, gusa kuva icyo gihe ibihugu bya Afurika byakomeje kurunenga kuba rwibasira abatuye ku mugabane wa Afurika gusa.

igisirikare-cya-amerika-kirashinjwa-ibyaha-byintambara-niyicarubozo
Ingabo za Amerika zirashinjwa gukorera imfungwa iyicarubozo


SRC: IGIHE

Perezida Kagame yahawe igihembo cy’umukuru w’igihugu wagize uruhare mu guteza imbere ikoranabuhanga
Guinea: Ebola igiye kwibagirana
Ubuhemu bwa RDC mu byatumye Col. Mutarambirwa yigobotora FDLR
Trump yabwiye Minisitiri w’Intebe w’u Bwongereza ko bashobora kutazacana uwaka

Tanga igitekerezo

Kwamamaza

Developed by Amitabha Technology, Inc.