DOVE MAGAZINE

Ibiza birimo imvura n’amapfa biheruka byahombeje u Rwanda miliyoni z’amadolari zirenga 30

Minisitiri w’Umutungo Kamere Dr Vincent Biruta, yashimye Guverinoma y’u Bwongereza na Australia zabimburiye ibindi bihugu bikize muri gahunda yo gukusanya miliyari $100 buri mwaka, yo kwifashishwa mu gushyigikira imishinga igamije gukumira ihindagurika ry’ibihe, rikomeje kugira ingaruka ku bihugu bitandukanye bidasize n’u Rwanda.

Ni mu nama yabereye muri Maroc, igihugu giteraniyemo inama y’Umuryango w’Abibumbye ku ihindagurika ry’ibihe, COP 22, iyo gahunda y’inkunga ikaba yaremejwe mu nama yabaye umwaka ushize i Paris.

Minisitiri Biruta yavuze ko ku Rwanda n’ibindi bihugu biri guhura n’ihindagurika ry’ibihe, gutera inkunga imishinga nk’iyi bitafatwaga nk’ibintu byihutirwa, ariko ubushakashatsi u Rwanda rwakoze rufatanyije na guverinoma y’u Bwongereza, bwerekanye ko ihindagurika ry’ibihe rihombya u Rwanda 1% by’umusaruro mbumbe w’igihugu buri mwaka.

Ati “Kuva muri Mutarama kugeza muri Nzeli uyu mwaka wonyine, imvura y’amahindu n’amapfa hamwe n’ibindi biza, byahitanye abantu basaga 50 ziteza n’ibihombo bisaga miliyoni 30 z’amadolari. Ikibazo cyo guhangana n’ihindagurika ry’ibihe n’iterambere ridahungabanywa n’ihindagurika ry’ibihe ryarahagurukiwe mu Rwanda.’’

U Rwanda ruheruka kwemerwa n’Ikigega Mpuzamahanga gitera inkunga imishinga yo kubungabunga ibidukikije no kurengera ikirere, Green Climate Fund, ndetse kirushyira mu bafite uburenganzira bwo gufatanya na cyo ku rwego mpuzamahanga, bikazatuma ruhabwa miliyoni 50 z’amadolari yo guteza imbere imishinga yo kwita ku bidukikije.

Mu ukwakira 2015, Green Climate Fund yahaye u Rwanda inkunga y’ibihumbi 300 by’Amadorali ya Amerika, ni ukuvuga amafaranga agera kuri miliyoni 219.

Ibyo ngo u Rwanda rwabikesheje kuba ruzi imbogamizi rufite, ruzi icyo rushaka kandi rufite na gahunda zihamye zizarugeza ku ntego.

Izo gahunda zirimo icyerekezo 2020 kidaheza umuntu n’umwe, ndetse na gahunda zashyizweho mu 2011 zigamije kubaka ubukungu butangiza ibidukikije kandi budahungabanywa n’imihindandagurikire y’ibihe “Green Growth and Climate Resilience Strategy”, zinjizwa muri gahunda y’Imbaturabukungu igamije kugabanya ubukene, EDPRS.

Minisitiri Biruta yakomeje ati “Ikindi twashyizeho Ikigega gitera inkunga imishinga yo kubungabunga ibidukikije, FONERWA, ubu kigejeje muri miliyoni 100 z’amadolari yo kubungabunga ibidukikije. Kuva cyajyaho, kimaze kwemeza imishinga 33 yo kurengera ibidukikije. Iryo shoramari rimaze kurengera ibihumbi bya hegitari zo ku mazi, ubutaka n’amashyamba ndetse ritanga imirimo igera ku 60 000 mu mishinga y’ibidukikije, mu kuzamura imibereho mu mpande zose z’igihugu.’’

Minisitiri Biruta yavuze ko u Rwanda rwishimira ubufatanye n’ikigega cy’Abongereza gishinzwe Iterambere mpuzamahanga, DFID, ndetse rukaba rwaratanze indi mishinga muri Green Climate Fund izahindura ubuzima bw’abatuye ibyaro, ku buryo ubu hari gukorwa inyigo z’iyo mishinga itandukanye.

Biruta yavuze ko nk’uko biri kuganirwaho muri COP 22, ibihugu bikeneye kugira icyo bikora mu gukumira ihindagurika ry’ibihe, kandi bigakora imishinga ibyara inyungu kandi ikaba ari imishinga idakenera amafaranga menshi cyane.

Ibihugu bikomeje imishinga itandukanye, aho mu masezerano byashyizeho umukono mu 2015 i Paris, byiyemeje gukumira izamuka ry’igipimo mpuzandengo cy’ubushyuhe bw’Isi muri iki kinyejana, kikaguma hasi ya dogere 2°C ariko intego ikaba ko kigera hasi ya dogere 1.5°C.

Mu Ukwakira 2016 nibwo ibihugu byemeranyije kuri gahunda yo gukusanya miliyari $100 buri mwaka hagati ya 2020 na 2025.

Minisitiri Biruta muri Maroc


SRC: IGIHE

Polisi y’u Rwanda yafashe abibye amafaranga y’abafundi b’Abayapani
Obama yafatiye ibihano abayobozi bane bo mu Burundi
Miss Rwanda 2016 azajya ahembwa ibihumbi 800 buri kwezi
USA: Umunyeshuri yatanze Drone izafasha u Rwanda gucunga inyamaswa zo mu Kagera

Tanga igitekerezo

Kwamamaza

Developed by Amitabha Technology, Inc.