DOVE MAGAZINE

Ibintu 10 wamenya kuri Tour du Rwanda kuva mu 2009 yaba mpuzamahanga

Mu gihe Tour du Rwanda 2016 isigaje umunsi umwe, IGIHE yasubiye mu mateka ikusanya ibintu 10 byaranze iri rushanwa kuva muri 2009 ubwo ryabaga mpuzamahanga rigashyirwa ku ngengabihe y’impuzamashyirahamwe y’umukino w’amagare ku isi, UCI.

1. Ku nshuro ya mbere kuva muri 2009, u Rwanda ruzahagararirwa n’amakipe (Clubs) arimo Team Rwanda, Les Amis Sportif na Benediction aho kuba Kalisimbi, Muhabura n’Akagera zari zisanzwe zisaranganywa abakinnyi zikaba arizo zikina mu izina ry’igihugu.

2. Abakinnyi babiri gusa, Nathan Byukusenge na Gasore Hategeka nibo bazagaragara uyu mwaka barakinnye Tour du Rwanda zirindwi ziheruka.

3. Abakinnyi 330 bakomoka mu bihugu 37 byo ku migabane yose y’Isi nibo bamaze kwitabira Tour du Rwanda kuva yaba mpuzamahanga

4. Batandatu mu bakinnyi basiganwe muri Tour du Rwanda bitabiriye Tour de France.

5. Ku nshuro ya mbere Tour du Rwanda ibaye mpuzamahanga izagera i Rusizi abakinnyi bavuye i Karongi ku ntera ya kirometero 115,9. Hazaba ari tariki 16 Ugushyingo 2016 bukeye bwaho bahaguruke i Rusizi banyure mu Ishyamba rya Nyungwe basoreze i Huye ku ntera ya kirometero 140,7 ari nako gace karekare gusumba utundi muri Tour du Rwanda uyu mwaka.

Umuyobozi w’Ishyirahamwe ry’umukino w’amagare mu Rwanda, Ferwacy, Bayingana Aimable, yasobanuye ko bahisemo kwerekeza muri iki gice cy’Uburengerazuba ku nshuro ya mbere kuko ikibazo cy’imihanda itujuje ibisabwa cyakemutse kandi ari no mu rwego rwo guha Abanyarwanda bose amahirwe yo kureba uyu mukino.

6. Kuva Tour du Rwanda yaba mpuzamahanga muri 2009, ni ubwa mbere itazagera mu Mujyi wa Rubavu. Impamvu ni uko byari ngombwa ko iri siganwa rinagera mu bindi bice by’igihugu nk’uko Aimable Bayingana yabisobanuye mu gihe cyo kugaragaza inzira Tour du Rwanda 2016 izanyuramo.

7. Eritrea nicyo gihugu kimaze kwegukana uduce (etapes) twinshi muri Tour du Rwanda (15) ikurikiwe n’u Rwanda (10). Kuri iyi nshuro, Umunya- Eritrea, Debesay Mekseb umaze kwegukana uduce twinshi (4) muri Tour du Rwanda ntabwo azayitabira kuko yamaze kujya mu ikipe ya Team Dimension Data, ikina amasiganwa akomeye ku rwego rw’Isi (World Tour) nka; Tour de France, Giro d’Italia, n’andi.

8. Mu mateka ya Tour du Rwanda kuva 2009, buri gihe umukinnyi wa kabiri yabaga akina mu ikipe imwe n’uwayegukanye. Mu 2009 yatwawe na Jelloul Adil akurikiwe na Saadoune Abdelati bo muri Maroc, 2010 yegukanwa na Teklehaimanot Daniel akurikiwe na Berhane Natnael bo muri Eritrea, 2011 yari Reijne NKiel akurikiwe na Rosskopf Joey bo muri Leta Zunze Ubumwe za Amerika.

Mu 2012 Umunya- Afurika y’Epfo, Lill Darren na mugenzi we Girdlestone Dylan nibo batsinze, mu 2013 Girdlestone Dylan na Meintjes Louis bo muri Afurika y’Epfo, mu 2014 yari Ndayisenga Valens akurikiwe na Nsengimana Jean Bosco naho iheruka ni Nsengimana Jean Bosco akurikiwe na Areruya Joseph b’Abanyarwanda.

9. U Rwanda na Afurika y’Epfo nibyo bihugu bifite agahigo ko kwegukana iri rushanwa inshuro ebyiri kandi byagiye bibikora byikurikiranya.

10. Iyi ishobora kuba Tour du Rwanda ya nyuma ibaye iri rushanwa rikiri ku rwego rwa 2.2 kuko umwaka utaha biteganyijwe ko ingengo y’imari yaryo izava kuri miliyoni 460 ikiyongera irushanwa naryo rikazamurwa mu ntera rikajya ku rwego rwa 2.1 bizatuma rirushaho kwitabirwa n’abakinnyi bakomeye ku Isi.

Eritrea nicyo gihugu kimaze kwegukana uduce twinshi muri Tour du Rwanda kuva muri 2009

Nsengimana Jean Bosco aramutse yisubije iri rushanwa yaba abaye umukinnyi wa mbere uryegukanye kabiri yikurikiranya

Tour du Rwanda imaze kwitabirwa n’abakinnyi 330 bakomoka mu bihugu 37

Umwaka ushize u Rwanda rwegukanye imyanya itatu ya mbere, Nsengimana Jean Bosco aba uwa mbere


SRC:IGIHE

Ladislas Ntaganzwa uherutse kuzanwa mu Rwanda yabajijwe n’Ubushinjacyaha
Havutse itsinda ry’abahanzi basubiramo indirimbo z’abandi
FERWAFA: Abantu bane barahatanira umwanya w’umuyobozi ushinzwe Tekiniki
Miley Cyrus yiyunze n’umusore bamaze imyaka itatu batandukanye

Tanga igitekerezo

Kwamamaza

Developed by Amitabha Technology, Inc.