DOVE MAGAZINE
DOVE RECORDS, INC.

AS Kigali yanyagiye Nyagatare ibitego 27 yegukana igikombe cya shampiyona

AS Kigali y’abagore, ikomeje kubaka amateka azagora indi yose mu Rwanda kuyakuraho aho yegukanye ibikombe bya shampiyona inshuro umunani zikurikiranya ari nako inyagira amakipe aba yahuye nayo.

Iyi kipe itozwa na Nyinawumuntu Grace usanzwe atoza Ikipe y’Igihugu y’Abagore, kuri uyu wa Gatandatu tariki ya 15 Ukwakira 2016, yari yakiriye Nyagatare WFC kuri Stade ya Kigali, iyinyagira ibitego 27 ku busa ihita inegukana igikombe cya shampiyona cy’uyu mwaka cyabaye icya munani cyikurikiranya.

Nyinawumtu ukomeje gufasha iyi kipe kubaka amateka, yabwiye IGIHE ko ari ibyishimo kuba begukanye iki gikombe.

Ati “Ni ibyishimo kuri twe kuba dutwaye igikombe cy’uyu mwaka. Ntibiba byoroshye ariko twarakoze cyane. Uyu mwaka ni igikombe cyinshimishije cyane kuko twari twarifuje ko Umuyobozi mushya w’Umujyi wa Kigali twamwakiriza igikombe none tubigezeho. Ikindi gikombe twatwaye tukishima cyane ni icya mbere dutsinda APR FC iturusha ariko tukayitwara igikombe.”

Nyinawumuntu avuga ko nubwo batwara ibikombe ariko arababaye cyane kubera urwego ruri hasi rw’andi makipe bahangana kuko bituma n’ikipe y’igihugu idatera imbere nk’uko byakagenze iyo amakipe yose aba akomeye.

Uyu mutoza asaba ko abayobozi b’amakipe bakwigira ku b’umujyi wa Kigali bagaha agaciro amakipe y’abakobwa haba mu kuyashyigikira mu mafaranga no kuyashakira abatoza bashoboye kuko ari byo bizatuma umupira w’abagore utera imbere.

Shyaka Nickolas utoza Nyagatare WFC ifite agahigo ko kuba imaze gutsindwa ibitego 207 uyu mwaka yo itarinjiza na kimwe, yavuze ko batari biteze gutsinda AS Kigali ariko ko bitatuma bava ku ntego bihaye yo kubaka ikipe ishingiye ku bana b’i Nyagatare.

Ati “Nibyo baradutsinze ariko hari amasomo dukuyemo yaba njye nk’umutoza, abayobozi n’abakinnyi. Mu kibuga ni ugutsinda, gutsindwa no kunganya ariko twe ntacyo bidutwaye kuko turi gutegura ikipe y’igihe kiri imbere.”

“Umwaka ushize twari muri shampiyona dusoza turi aba gatandatu. Nyuma twasanze nta kamaro kuko twakinishaga abakinnnyi bo hirya no hino ariko nta mwana w’i Nyagatare urimo, dusanga nta musaruro ku Karere. Ubu turimo gukinisha abana bo mu Karere kacu gusa nubwo twatsindwa turakomeza gutegura. Intego ni uko mu myaka itatu twaba dufite umukinnyi mu Mavubi.”

Uyu mutoza nawe yunze mu rya Nyinawumuntu avuga ko kuba ikipe ya Nyagatare WFC ititwara neza ari uko abayobozi mu Karere ka Nyagatare batayitaho nk’uko bita kuri Sunrise FC kandi zose ari ikipe z’Akarere, asaba by’umwihariko abayobozi b’abagore kugerageza kwibuka barumuna babo bakabavuganira bagafashwa.

Igikombe AS Kigali yegukanye izagishyikirizwa nyuma y’umukino wa nyuma wa shampiyona uzakinwa mu mpera z’icyumweru gitaha ikina na Gakenke.

AS Kigali yarushije bigaragara Nyagatare inayitsinda ibitego 27

Nyagatare ngo ntitewe ikibazo no gutsindwa na AS Kigali kuko ikiri kwiyubaka

AS Kigali yatwaye igikombe cya shampiyona ku nshuro ya munani yikurikiranya

Umutoza wa Nyagatare yemeza ko bashyize imbere kubaka ikipe bahereye ku bana bo muri aka karere

Nyinawumuntu avuga ko bashimishijwe no kuba batwaye igikombe


SRC: IGIHE

Cameroun: Rayon Sports yahiriwe n’urugendo itsinda Panthère du Ndé
Ibuka iratabariza impfubyi za Jenoside zitagira aho zirambika umusaya
Mutesi Jolly azahagararira u Rwanda muri Miss World
Kivu Watt na FDLR mu byaranze ibiganiro bya Perezida Kagame na Kabila

Tanga igitekerezo

Kwamamaza

Developed by Amitabha Technology, Inc.