DOVE MAGAZINE

Aho itangazamakuru ryo mu Rwanda rihagaze mu mboni y’abanyapolitiki

Nyuma y’urugendo rurerure itangazamakuru ryo mu Rwanda ryanyuzemo n’amateka atari make rifite muri politiki y’igihugu, kuri ubu abanyapolitiki batandukanye baremeza ko hari impinduka rigaragaza cyane cyane mu kubaka igihugu binyuze mu kunga Abanyarwanda no kubatoza iterambere.

Nta wabura kuvuga ko Itangazamakuru rya none ritandukanye kure n’irya mbere ya Jenoside yakorewe Abatutsi, ryakoreshejwe nk’umuyoboro wo kubiba urwango n’amacakubiri byagejeje u Rwanda kuri Jenoside yahitanye Abatutsi barenga miliyoni imwe.

Uyu munsi itangazamakuru ni kimwe mu bifasha Abanyarwanda kwiteza imbere, kumenya uko igihugu cyabo kiyobowe ndetse bakanamenya gahunda za Leta zibayobora mu cyerekezo cy’iterambere,nk’uko bamwe mu banyapolitiki babivuga.

Mu mahugurwa y’umunsi umwe yahuje abanyamakuru n’abanyapolitike tariki ya 6 Nzeli, Senateri Tito Rutaremara yagarutse ku ntambwe itangazamakuru ryo mu Rwanda rimaze gutera.

Yagize ati“Itangazamakuru ryo mu Rwanda rimaze gutera intambwe igaragara. Icya mbere, abanyamakuru bamaze gutera intambwe mu bitekerezo byubaka, n’iyo bagira ibyo banenga ariko burya baba bubaka, biba ari ibitekerezo bizima. Bamaze gutera intambwe no mu busesenguzi.”

Ku bwe asanga imikorere myiza y’itangazamakuru ryo mu Rwanda yakwiyongera ndetse ikagera ku rundi rwego rushimishije ariko ikazitirwa n’ubukene butuma bamwe bakoreshwa n’indonke runaka.

‘Njye ndi Leta naguha amafaranga nkakubwira n’ibyo wandika, utabyandika nkayakwima’

Senateri Tito yakomeje agira ati “Ikibazo kigihari ni uko hari ibinyamakuru bisohoka uyu munsi bikamara igihe kirekire bitongeye gusohoka. Hari ikibazo mukunda kuvuga ngo Leta niduhe amafaranga. Njye ndi Leta nayabaha ariko nkanjya mbabwira nti ‘mwandike ibi, mutabyandika nkayabima’[….]ntabwo mukoreshwa n’abanyapolitike ahubwo mukoreshwa n’amafaranga babaha cyangwa izindi nyungu mukura mu banyapolitiki.”

Yakomoje ku mvugo ikunze gukoreshwa ngo “Ibinyamakuru byigenga”, avuga ko nta cyigenga kibaho ahubwo biterwa n’umurongo gifite.

Ati “Nta kinyamakuru cyigenga ahubwo wenda hari ikinyamakuru gikurikiza umurongo wa Leta, igikurikiza umurongo cyahisemo,hakaba n’igikurikiza ubukene bwacyo.”

Itangazamakuru mu mboni ya Dr. Ndahiro

Umujyanama wa Perezida wa Repubulika,ushinzwe ibijyanye n’itumanaho, Dr Ndahiro Alfred,na we yemeza ko hari intambwe igaragara itangazamakuru ryo Rwanda rimaze gutera.

Ati «Nageze mu Rwanda mu 2002, hari ibinyamakuru bikeya cyane, amanota nari kubiha ntiyari kugera kuri 50%, ariko ubu ngubu hari impinduka nini cyane nubwo tutaragera aho twifuza. Ubu umuntu yabaha nka 70%.»

Mukabunani hari ibyo ashinja itangazamakuru

Nubwo bimeze bityo ariko hari abandi banyapolitike batunga urutoki itangazamakuru, bavuga ko hari igihe ribogama kubera indonke, ibi bikaba byavamo kuyobya rubanda.

Umuvugizi w’imitwe ya Politike mu Rwanda, Mukabunani Christine, avuga ko abanyamakuru akenshi batwarwa n’inyungu bateze ku muntu cyangwa ikigo runaka bakabogama.

Yagize ati « Abanyamakuru akenshi batwarwa n’inyungu bari bukure ku banyapolitiki, ugasanga bijyanye n’icyo uri bubahe cyangwa izindi nyungu bari bugukureho, bagatangaza inkuru babogama. Abanyamakuru n’abanyapolitiki bakwiye gukorana neza hatarimo icyo twakwita nka ruswa cyangwa kubogama. »

Depite Byabarumwanzi François we asanga kugira ngo itangazamakuru rirusheho kwiyubaka, abanyamakuru bagomba kwirinda gutangaza ibihuha, inkuru zibiba urwango, cyangwa izibogamye, bakazirikana ko ari Abanyarwanda mbere y’ibindi.

Abahanga bavuga ko itangazamakuru ari ubutegetsi bwa kane nyuma y’Ubutegetsi Nshingamategeko, Nyubahirizategeko n’Ubucamanza.

Bitewe n’icyizere rigirirwa na rubanda, iyo rikoze neza ritanga umusanzu ufatika mu kubaka igihugu kigatera imbere, ryakoreshwa nabi rikoreka imbaga.

Inkuru bifitanye isano: Ese Itangazamakuru ni ishoramari rishoboka mu Rwanda?


SRC: IGIHE

Perezida Kagame yatangiye uruzinduko rw’akazi muri Algeria
Byahishuwe ko umuhanzi Prince yishwe n’ibiyobyabwenge
Umuntu wese uhinga akabasha kubaho si umushomeri - Minisitiri Uwizeye
Uko umuyobozi muri FDLR yabwiye Gen.Kabarebe ko azagaruka mu Rwanda nta Mututsi ukirubamo

Tanga igitekerezo

Kwamamaza

Developed by Amitabha Technology, Inc.