DOVE MAGAZINE
The Next Star Rwanda

Afurika ikwiye kwishakamo ibisubizo by’iterambere n’umutekano

Share Button

Musanze, 17 Gicurasi 2017

Mu nama nyunguranabitekerezo ku  mutekano w’Afurika, imaze iminsi 3 ibera mu Ishuri Rikuru rya Gisirikare ry’Ingabo z’u Rwanda mu karere ka Musanze, abari bayirimo biganjemo inzobere mu by’umutekano , inararibonye mu bya politike hamwe n’abashakashatsi, bagaragaje ko iki ari gihe cyo kugira ngo ibihugu by’Afurika bifate iya mbere mu kwikemurira ibibazo by’umutekano n’iterambere badateze amaboko ku mahanga.

Muri ibi biganiro hashimangiwe ko ibihugu by’Afurika bikeneye gufatanya no kurushaho kubaka imibanire myiza hagati yabyo bigasenyera umugozi umwe mu kurandura imitwe yitwaje intwaro, ibitero by’iterabwoba n’ibindi bibazo bibangamiye umutekano kuri uyu mugabane. Abari mu nama bavuze ko ubuyobozi buhamye bufite icyerekezo ari ngombwa kugira ngo ibihugu bitere imbere.

Minisitiri w’Ingabo z’u Rwanda, Gen James Kabarebe ni we wasoje ibi biganiro byari bigenewe abasirikare bo mu bihugu by’Afurika barimo gukurikirana amasomo mu Ishuri rikuru ry’Ingabo z’u Rwanda i Musanze. Akaba yashimiye abagize uruhare muri ibi biganiro avuga ko byatanze umusaruro ku banyeshuri “ Ndizera ko aba basirikare bakuru b’abanyeshuri bavanye impamba ikomeye y’ubwenge bungukiye muri ibi biganiro kandi nta kabuza ibyo bize bizabafasha mu bushakashatsi hamwe n’akazi kabategereje kajyanye no kubungabunga umutekano haba mu bihugu byabo ndetse n’ahandi hirya no hino”

Abayobozi bakuru b’igihugu barimo Minisitiri w’Ububanyi n’amahanga, Louise Mushikiwabo, Minisitiri w’ubukungu, Amb Clavel Gatete hamwe na Minisitiri w’Ingabo, Gen James Kabarebe  bari mu batanze ibiganiro kuri uyu munsi usoza. Hari n’abashyitsi baturutse mu bindi bihugu nka Perezida w’Inteko nshingamategeko y’ibihugu bigize EAC, Daniel Fred Kidega nawe wari mu batanze ikiganiro.

Bakaba bibanze ku buryo Afurika yagira ijambo mu ruhando mpuzamahanga, n’uburyo idakwiye gukomeza guhanga amaso ku mfashanyo ziva hanze mu gukemura ibibazo byugarije uyu mugabane.

Mu minsi 2 itambutse abari muri iyi nama baganiriye ku zindi ngingo harimo ibijyanye n’ibibazo bigaragara mu kurwanya imitwe yitwaje intwaro iteza umutekano muke mu bihugu bigize akarere k’ibiyaga bigari, ibikorwa byo kubungabunga amahoro, kurwanya iterabwoba, ibitero by’ikoranabuhanga, imihindagurikire y’ikirere n’ingaruka bifite ku mutekano n’iterambere ry’Afurika.

Umwe mu banyeshuri uturuka muri Malawi, Lt Col H Chilenga yagize ati: “Iyi nama yaguye ubumenyi bwacu ku buryo dukwiriye kubungabunga umutekano w’ibihugu byacu, tugatahiriza umugozi umwe nk’abanyafurika no kumenya kurengera inyungu z’ibihugu byacu mu ruhando mpuzamahanga”

Aba basirikare bakuru bakurikiye ibi biganiro bagize icyiciro cya 5 cya ofisiye bakuru bakurikira amasomo yo kuyobora abasirikare. Bose hamwe ni 47 baturutse mu bihugu 11 byo ku mugabane w’Afurika aribyo Ethiopia, Ghana, Kenya, Malawi, Nigeria, Rwanda, Senegal, South Sudan, Tanzania, Zambia na Uganda.

Etihad iri mu nzira zo kugura RwandAir
Amazi ya Nyabarongo yatangiye gukoreshwa i Kigali
Obama yabwiye Trump ko kwinjira muri White House atari imikino
Umuhanzikazi Gretta yahagaritse umuziki abitegetswe n’umugabo bagiye gushyingirwa

Tanga igitekerezo

Kwamamaza

Developed by Amitabha Technology, Inc.