DOVE MAGAZINE

ADEPR yahakanye kuba inganzwa ya Politiki

Itorero ADEPR rirahakana kwijandika muri politiki, nyuma y’aho benshi batangiye guhwihwisa ko muri iryo torero aho bukera, ahari imyemerere haza kwimukira imiyoborere cyangwa imitegekere.

Hashize iminsi abantu banenga ubuyobozi bwa ADEPR, bavuga ko bwivanga muri Politiki ku buryo benshi batanatinya kuvuga ko ahari imyemerere hashobora kwimukira imiyoborere, gusa ibyo byose iryo torero rirabihakana.

Mu kiganiro cyihariye IGIHE yagiranye na Pasitori Ruzibiza Viateur ushinzwe ibikorwa by’ivugabutumwa no guhuza iki iryo torero n’Itangazamakuru, yatangaje ko “Kwivanga muri Politiki” bidakwiye kuvugwa, kuko umuntu yivanga mu bitamureba kandi Politiki y’igihugu ikaba ireba n’amadini cyane.

Iri torero ryakunze kumenyekana mu myemerere isa n’iyihariye kandi ikakaye ugereranyije n’andi matorero. Iyo myemerere ishingiye ku ngingo eshanu ari zo: umubatizo, ifunguro ryera, gusabira abana umugisha, gushyingira, no gushyingura.

Umuyobozi wa ADEPR yandika ku bubiko bw’amabaruwa bari bazanye asaba ivugururwa ry’Itegeko Nshinga

Mu bijyanye n’imyitwarire, Pasitori Ruzibiza avuga ko umuyoboke wa ADEPR imushishikariza gushyira imbere umwimerere mu nguni zose z’ubuzima, harimo imyambarire, imirire, ndetse no gukunda akazi.

Umwimerere ukaba ufasha abayoboke kudatakaza umwanya barangarira ibidafite agaciro, ahubwo bagatumbera ibitanga ubuzima bwiza nk’uko abivuga.

Ku bavuga ko ryaba rifite amahame akomeye, atakwihanganirwa na buri wese, Pasitori Ruzibiza avuga ko ahubwo kuba muri ADEPR ari amahitamo meza, kuko nta na rimwe abarivamo bajya baruta abarijyamo.

Ruzibiza ati “Ibyo bintu bavuga ko bikomeye bikitabirwa n’abantu benshi, ahubwo nkeka ko abantu bahindura imvugo bakavuga ko ari byo byoroshya ubuzima…ahubwo tugira Imana mu mirimo yacu ku buryo byigaragaza.”

“Ntitwivanga muri Politiki ahubwo natwe iratureba”

Ruzibiza avuga ko zimwe mu nkingi ADEPR igenderaho harimo ubukungu n’iterambere, Ivugabutumwa, imiyoborere, imibanire n’izindi nzego. Bityo ngo mu gihe Politiki y’u Rwanda izaba ari Politiki nziza kandi igatanga uburenganzira ku myemerere y’amadini nta kizatuma idashyigikirwa na ADEPR.

Icyakora, ngo ibyo si byo bivuga ko bivanga muri Politiki, ahubwo iryo torero riba rikora inshingano zaryo.

Ati “ADEPR nta kibazo na kimwe kiri mu mibanire yayo na Leta kuko ntaho Politiki ya Leta ibangamiye imyizerere n’imyemerere yacu. Kandi twumva icyerekezo nyakubahwa Perezida wa Repubulika afite twagishyigikira kuko byinshi birimo biri no mu nshingano zacu nk’itorero, nko gufasha abatishoboye n’ibindi.”

Avuga ko abavuga ko ADEPR yivanga muri Politiki baba babeshya, kuko utaba ufite abantu basaga Miliyoni ebyiri ngo ureke gutanga umusanzu muri Politiki.

Yagize ati “Niba ADEPR ifite abaturage barenga Miliyoni y’Abanyarwanda n’andi madini ni uko, nituvuga ngo tureke kwivanga muri Politiki izasigaranwa na nde? [….] Iyo bavuga kwivanga wagirango ni ibindi bintu bitatureba, kandi ubuzima bw’igihugu bureba n’itorero. Abo tubwiriza ni abanyarwanda kandi benshi mu banyarwanda ni abakirisitu b’itorero […] Kwivanga muri Politiki ucumbikira utishoboye sinumva ko byaba ari ikibazo.”

ADEPR na miliyoni z’abayoboke basabye ko Itegeko Nshinga rivugururwa

Itorero rya ADEPR rigenda rigaragara muri byinshi mu bikorwa bya Politiki, ndetse igiheruka cyanavugishije benshi, ni ukujyana amabaruwa y’ubusabe ku ivugururwa ry’Itegeko Nshinga.

Ruzibiza uvugira ADEPR avuga ko itorero ari ukuboko kw’iburyo kwa Leta, ndetse nta gikuba cyacitse kuba muri iyi minsi ikunda kugaragara mu bikorwa bya Politiki.

Abayoboke n’abayobozi ba ADEPR ngo si ikosa kuba bagaragara mu bikorwa bya Politiki kuko na bo birabareba

Avuga ko na kera ADEPR yakunze kugaragara ishyigikira byinshi mu bikorwa bya Leta, ahubwo ari uko nta tangazamakuru ryabishyiraga ku karubanda.

Yongeyeho ko icyemezo cyo kujyana ubusabe bwo kuvugurura Itegeko Nshinga ntawigeze akibagiramo Inama, kuko ari abantu bakuru kandi bazi kureba ikibi n’icyiza.

Iri torero ngo rishimishwa no kugira imyanya itandukanye ya Politiki ku bayoboke baryo ukuyemo abapasitori, kuko bo bataba bakwiye kugaragaza imvamutima zabo kuri Politiki.

Ati“Pasitori mu bitekerezo ushobora kugira ibyo ushyigikira, ariko ntiwakwambara ibirango by’ishyaka […] gusa hagize ubona umwanya mu buzima bw’igihugu ntacyo byadutwara ahubwo ni byo twifuza.”

Induru za hato na hato zikururwa n’iki muri ADEPR?

Muri ADEPR hagiye humvikana ubwumvikane bucye ku buryo benshi bibazaga niba iryo torero ritazacikamo ibice.

Ruzibiza avuga ko biterwa n’uko hari benshi batishimira impinduka ndetse hari n’abazamuka bakagera mu bushorishori mu buzima bw’itorero, ariko batarahinduka.

Yagize ati “Ntabwo dushyiraho akayunguruzo kayungurura imyemerere y’abantu, umuntu ashobora kugera no kurwego rwo hejuru atarahinduka […] ntiwambwira ko Miliyoni y’abantu yanezerwa kimwe. Ni yo mpamvu hari abanejejwe n’ubuyobozi kandi babusabye Imana, ariko hari n’abandi bake batabyishimira, ari bo bagenda.”

Itorero ADEPR ni itorero ry’ubukombe ryatangiye mu mwaka wa 1940, bivuze ko rimaze imyaka imyaka 75. Ryagiye rivugwamo ibibazo bitandukanye by’ubwumvikane bucye bushingiye ku mitungo n’imiyoborerwe y’iryo torero, aho bamwe bagiye banaryiyomoraho bagashinga andi matorero ajya gusa no gukora nka ryo.

Ese koko imyemerere yasimbuwe n’imiyoborere?

Bidatinze turabagezaho igice cya kabiri cy’iyi nkuru, kivuga ku buzima bwite bwa ADEPR

Afunzwe azira kwiyitirira Minisitiri w’ingabo Gen. James Kabarebe akiba amafaranga
Bitandukanyije na FDLR bashaka gutangirira umwaka mu Rwanda
Umuherwe MO Ibrahim asanga ikibazo cy’u Burundi kigiye kwerekana icyo Afurika aricyo
Haracyari igihe ngo inzibutso za Jenoside zinjire mu murage w’isi

Tanga igitekerezo

Kwamamaza

Developed by Amitabha Technology, Inc.