DOVE MAGAZINE

Abasenateri bahaye Leta umukoro wo guhangana n’inda zibasiye 55% by’amashyamba

Abasenateri bahuriye muri Komisiyo y’Iterambere ry’Ubukungu n’imari bavuga ko mu gihe ibiti by’inturusu bigize 55% by’amashyamba y’u Rwanda byaba bikomeje kwangizwa n’udukoko tuzwi nk’inda twakwirakwiye mu gihugu, umugambi wo guhangana n’ibibazo bishingiye ku kubungabunga ibidukikije ntibyagerwaho; bagasaba Leta gushaka igisubizo kirambye kuri icyo kibazo.

Muri gahunda zo guteza imbere ibidukikije u Rwanda rwihaye harimo kuba mu mwaka wa 2018 nibura 30% by’ubuso bwose bw’igihugu hatabariwemo amazi buzaba buteyeho amashyamba, ndetse kugeza ubu hafi ya hegitari 700.000 zingana na 29.2% ziteyeho amashyamba.

Gusa Ministeri y’Umutungo kamere yavuze ko nubwo hari hamaze guterwa ku kigero gishimishije, amashyamba akibangamiwe na bimwe mu bikorwa bya muntu, cyane ko Abanyarwanda basaga 98% bagikoresha ibikomoka ku biti mu gihe bashaka guteka.

Uretse ikibazo cy’abayacana n’abayangiza mu bundi buryo bunyuranye, amashyamba yiganjemo inturusu ku buso busaga 55%, nyamara zimaze igihe zibasiwe n’udukoko tuzwi nk’inda dutuma zuma zihagaze, ibishobora gutuma iyi ntego igihugu cyihaye itagerwaho.

Mu biganiro nyunguranabitekerezo ku ishyirwa mu bikorwa rya politiki y’amashyamba Komisiyo y’iterambere ry’ubukungu n’imari yagiranye na Minisiteri y’Umutungo Kamere, Abasenateri bagaragaje impungenge zishingiye kw’iyangirika ry’igice kinini kigize amashyamba cyangijwe n’izi nda, maze basaba ko haboneka umuti urambye.

Minisitiri w’Umutungo kamere, Dr. Vincent Biruta, yavuze ko mu bumenyi bamaze kugira kuri utu dukoko, umuti watwo utaraboneka, ariko akavuga ko uramutse unabonetse ugaterwa mu mashyamba wakwangiza inzuki, bikagira ingaruka ku musaruro wazo, ndetse ngo imvura iguye yawohereza mu mazi ugasanga amafi n’ibindi binyabuzima bibamo bikangirika.

Yagize ati”Umuti wo kwica utu dusimba twitwa inda ntiwabura ariko uwukoresheje wakwangiza inzuki, ubuki bukabura. Uyu muti kandi tuwuteye imvura ikagwa yawujyana mu migezi ukica urusobe rw’ binyabuzima biyirimo.”

Iyi ndwara iterwa n’ubucucike bw’amashyamba no kubura amazi mu biti

Minisitiri Biruta yavuze ko iyi ndwara ikunda kugaragara mu bihe by’ubushyuhe, ndetse no kuba amashyamba yo mu Rwanda afite ubucucike bukabije ku buryo ibiti bitabasha guhumeka, ibindi ngo byabuze amazi ahagije yatuma bihangana n’iki kibazo.

Minisitiri yatangaje ko imiti ya kizungu itakoreshwa kuri iki kibazo, ahubwo ko umuti urambye ari baturage bagomba gufata neza amashyamba bayacukuramo imirwanyasuri kugira ngo amazi agumemo, bikazafasha mu guca izi nda.

Minirena ivuga ko iki kibazo atari umwihariko w’u Rwanda, kuko no muri Australia iyi ndwara yibasiye inturusu zaho kandi ngo niho ingemwe zatewe mu Rwanda zaturutse.

Iki kibazo kandi ngo giherutse kugaragara muri Canada batera umuti mu biti, ariko ingaruka zawo mbi zatumye bawuhagarika.

Minister of Natural Resources Dr. Vincent Biruta
Minisitiri w’Umutungo kamere, Dr. Vincent Biruta

Inturusu zazahajwe n’udukoko twitwa inda twibasiye 55% by’amashyamba y’igihugu


SRC: IGIHE

U Rwanda rwafashe ingamba zikumira ‘Zika’
Imbere ya Ban Ki-moon, Perezida Nkurunziza yemeye kurekura imfungwa 2000
Miss Mutesi Aurore yagaye abahaye inkwenene Icyongereza cya Myasiro
Bwa mbere mu rukiko, S/Lieutenant Seyoboka ati “Njye sinzi kuburana”

Tanga igitekerezo

Kwamamaza

Developed by Amitabha Technology, Inc.